ដោយៈ គង់ សូរិយា
ភ្នំពេញៈ ក្រុមហ៊ុន CHN Energy Investment Group Co. LTD ដែលជាក្រុមហ៊ុនរុករករ៉ែ និងថាមពលដែលគ្រប់គ្រងរបស់ប្រទេសចិនបានស្នើការវិនិយោគ ផ្តោតលើប្រភពថាមពលកកើតឡើងវិញ ថាមពលពន្លឺព្រះអាទិត្យ និងទំនប់វារីអគ្គិសនី។
សំណើនេះត្រូវបានលើកឡើង នៅក្នុងជំនួបកាលពីរសៀលថ្ងៃទី៨ ខែមេសា ឆ្នាំ២០២៤ រវាងលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា និងតំណាងក្រុមហ៊ុន CHN ENERGY។
ក្រុមហ៊ុនបានអោយដឹងថា គោលបំណងនៃជំនួបនេះ គឺដើម្បីពិនិត្យ និងពិភាក្សាអំពីកាលានុវត្តភាពវិនិយោគ លើគម្រោងថាមពលកកើតឡើងវិញ ដែលមានទុនវិនិយោគប្រមាណ១ពាន់លានដុល្លារនៅកម្ពុជា។
ក្រុមហ៊ុនបានសង្កត់ធ្ងន់ថា ការវិនិយោគលើគម្រោងថាមពលកកើតឡើងវិញ រួមមានការសាងសង់វារីអគ្គិសនី និងគម្រោងថាមពលពន្លឺព្រះអាទិត្យ។
ប្រភពដដែលបានអោយដឹងទៀតថាថា “កម្ពុជាគឺជាទីតាំងយុទ្ធសាស្ត្រ ដែលមានសក្តានុពល សម្រាប់ការធ្វើអាជីវកម្មក្នុងវិស័យខាងលើ ដែលគាំទ្រដល់ប្រតិបត្តិការអាជីវកម្មដ៏ទាក់ទាញ និងលេចធ្លោបំផុតនៅក្នុងតំបន់”។
លោក សួន សុផលបានវាយតម្លៃខ្ពស់ ចំពោះគម្រោងវិនិយោគថាមពល និងបានបន្ថែមថា ក្រុមប្រឹក្សាអភិវឌ្ឍន៍កម្ពុជាត្រៀមខ្លួនរួចជាស្រេចក្នុងការគាំទ្រក្រុមហ៊ុន។
លោកបានបន្តថា “កម្ពុជាស្វាគមន៍ ចំពោះគម្រោងវិនិយោគរបស់ក្រុមហ៊ុននេះ ព្រោះវាស្របតាមនិន្នាការក្នុងតំបន់ និងអន្តរជាតិ ដែលបាននិងកំពុងបោះជំហានឆ្ពោះទៅមុខ ដើម្បីបំប្លែងថាមពលទៅជាថាមពលបៃតង”។
លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានឲ្យដឹងថា ថាមពលកកើតឡើងវិញ ដែលប្រើប្រាស់ក្នុងប្រទេសកម្ពុជា មានប្រមាណ៦២ភាគរយ នៃការប្រើប្រាស់ថាមពលសរុបរបស់ប្រទេស។
ថាមពលកកើតឡើងវិញ សំដៅលើថាមពលដែលបានមកពីប្រភពដូចជា វារីអគ្គិសនី ថាមពលពន្លឺព្រះអាទិត្យ និងថាមពលជីវម៉ាស។
បច្ចុប្បន្នកម្ពុជា មានលទ្ធភាពផលិតថាមពលប្រមាណ ៤០០០ មេហ្គាវ៉ាត់ក្នុងមួយឆ្នាំ ប៉ុន្តែការប្រើប្រាស់ប្រចាំឆ្នាំមានប្រហែល ២៤០០ មេហ្គាវ៉ាត់ប៉ុណ្ណោះ ដូច្នេះកម្ពុជាកំពុងពិចារណា នាំចេញថាមពលរបស់ខ្លួន ទៅកាន់ប្រទេសក្នុងតំបន់នាពេលអនាគត។
លោកសួន សុផល បានអំពាវនាវឱ្យអ្នកវិនិយោគបរទេសពិចារណា វិនិយោគលើថាមពលបៃតងនៅកម្ពុជា ដើម្បីអាចរួមចំណែកដល់ការផ្លាស់ប្តូរថាមពលនៅក្នុងប្រទេស និងក្នុងតំបន់តាមរយៈការជួញដូរថាមពលឆ្លងដែន៕