ដោយ: គង់ លាងហួរ
ប៉េកាំង: ធនាគារឧស្សាហកម្ម និងពាណិជ្ជកម្មចិន (ICBC) គ្រោងផ្តល់ហិរញ្ញប្បទាន ប្រមាណ៤១,៤៦ពាន់លានដុល្លារ ដើម្បីជំរុញវិស័យទេសចរណ៍ នៅក្នុងប្រទេសរបស់ខ្លួន ស្របពេលដែលការចំណាយរបស់អ្នកប្រើប្រាស់កំពុងមានការធ្លាក់ចុះ។
ធនាគារដ៏ធំបំផុតរបស់ប្រទេសចិន ICBC បានចុះហត្ថលេខាលើកិច្ចព្រមព្រៀង សហប្រតិបត្តិការ ជាមួយក្រសួងវប្បធម៌ និងទេសចរណ៍ចិន កាលពីថ្ងៃទី២ ខែមេសា ដើម្បីជំរុញការវិនិយោគ និងការចំណាយទៅលើវិស័យទេសចរណ៍។ នេះបើយោងតាមសេចក្តីថ្លែងការណ៍ ដែលត្រូវបានបង្ហោះនៅលើគណនី WeChat ផ្លូវការរបស់ក្រសួង។
សេចក្តីថ្លែងការណ៍ដដែលបានបន្តថា ធនាគារICBC និងក្រសួ ងប្តេជ្ញាថា នឹងធ្វើការរួមគ្នា លើគម្រោងសំណង់សំខាន់ៗ ទាក់ទងនឹងវិស័យទេសចរណ៍។ ជាមួយគ្នានេះ ភ្នាក់ងារទេសចរណ៍មួយចំនួនទៀត ដែលមានមូលដ្ឋាន នៅតាមបណ្តាទីក្រុងក្នុងតំបន់អាស៊ី រួមមាន ទីក្រុងសេអ៊ូល ទីក្រុងតូក្យូ និងប្រទេសថៃ ក៏បានចុះហត្ថលេខាលើកិច្ចព្រមព្រៀងជាមួយសាខារបស់ធនាគារ ICBC ផងដែរ។
សេដ្ឋកិច្ចរបស់ប្រទេសចិន បានរងផលប៉ះពាល់អវិជ្ជមានយ៉ាងខ្លាំង ដោយសារសម្ពាធនៃវិបត្តិបរិត្តផរណា និងការអូសបន្លាយនៃវិបត្តិអចលនទ្រព្យ ដែលធ្វើឱ្យការចំណាយរបស់អ្នកប្រើប្រាស់ធ្លាក់ចុះ។ ទោះជាយ៉ាងណាក្តី វិស័យទេសចរណ៍ត្រូវបានគេមើលឃើញថា ជាចំណុចវិជ្ជមានសម្រាប់ទ្រទ្រង់សេដ្ឋកិច្ចចិន។
ជាក់ស្តែង កាលពីឆ្នាំមុន ចំនួនភ្ញៀវទេសចរណ៍ក្នុងស្រុករបស់ប្រទេសចិន បានកើនឡើង៩៣,៣ភាគរយ បើធៀបនឹងឆ្នាំ២០២២ ជាមួយនឹងការចំណាយ ក្នុងទំហំទឹកប្រាក់ប្រមាណ៤,៩១ទ្រីលានយ័ន ដោយកើនឡើង១៤០,៣ភាគរយ។
ចំណែកក្នុងអំឡុងពេលវិស្សមកាល នៃពិធីបុណ្យចូលឆ្នាំចិន ដែ លមានរយៈពេល៨ថ្ងៃ កាលពីខែកុម្ភៈ ឆ្នាំ២០២៤នេះ គេសង្កេតឃើញថា ការធ្វើដំណើរក្នុងស្រុក បានកើនឡើង១៩ភាគរយ បើធៀបនឹងកម្រិតក្នុងឆ្នាំ២០១៩ ខណៈដែលការចំណាយបានកើនឡើង៧,៧ភាគរយ៕ប្រភព:Bloomberg៕