ដោយៈ គង់ ម៉ាលីនណា
ភ្នំពេញៈ លោក សោភ័ណ ត្រូវបានសមាជិកបោះឆ្នោតជ្រើសរើស ជាប្រធានសមាគមធនាគារនៅកម្ពុជា ក្នុងមហាសន្និបាតប្រចាំឆ្នាំ នាថ្ងៃទី២៨ ខែមីនា ឆ្នាំ២០២៤។
នេះបើតាមសេចក្តីប្រកាសព័ត៌មាន របស់សមាគមធនាគារនៅកម្ពុជា សមាសភាពក្រុមប្រឹក្សានៃសមាគម ដែលបានជាប់ឆ្នោតសម្រាប់អាណត្តិទី១០នេះ គឺមានចំនួន១២រូប។
លោក រ័ត្ន សោភ័ណ ជាប្រធាននាយកប្រតិបត្តិ នៃធនាគារ Maybank បានក្លាយជាប្រធានសមាគមធនាគារនៅកម្ពុជា(ABC) ក្នុងអាណត្តិទី១០(ពីឆ្នាំ២០២៤-២០២៥)។
លោកបានកាន់តំណែងនេះ ជំនួសលោក Raymond Sia ប្រធាននាយកប្រតិបត្តិ នៃធនាគារកាណាឌីយ៉ា។ក្រៅពីលោក រ័ត្ន សោភ័ណ ជាប្រធានសមាគមធនាគារនៅកម្ពុជាហើយនោះ គឺមានលោកRaymond Sia Say Guan ជាអនុប្រធាន ខណៈលោក ហាន ប៉េងក្វាង អគ្គនាយកនៃធនាគារ វីង (ខេមបូឌា) ម.ក ជាហេរញ្ញិកសមាគមធនាគារ ដែលមានសមាជិក៩នាក់។
ប្រធានសមាគមធនាគារថ្មី នៅកម្ពុជារូបនេះ បានប្ដេជ្ញាបម្រើវិស័យធនាគារ និងសមាជិករបស់ខ្លួន ឱ្យកាន់តែប្រសើរមួយកម្រិតថែមទៀត។ ជាមួយសមាជិកក្រុមប្រឹក្សាអាណត្តិថ្មី លោក សោភ័ណ បានបញ្ជាក់ពីចក្ខុវិស័យរបស់ខ្លួន និងសសរស្តម្ភចំនួន៤។
លោក សោភ័ណ បានកំណត់នូវរចនាសម្ព័ន្ធអភិបាលកិច្ចល្អ និងមុខងារ និងការប្រព្រឹត្តទៅ នៃសមាគមធនាគារនៅកម្ពុជា។ សសរស្តម្ភទី២ គឺផ្តល់ប្រឹក្សាលើការគ្រប់គ្រង និងប្រតិបត្តិធនាគារប្រកបដោយការទទួលខុសត្រូវ និងផ្អែកលើគុណតម្លៃ ដើម្បីបង្កើនជំនឿទុកចិត្តពីសាធារណជន ជំរុញបរិយាបន្នហិរញ្ញវត្ថុ ព្រមទាំងលើកកម្ពស់ភាពរឹងមាំ និងភាពលូតលាស់នៃវិស័យធនាគារ ដើម្បីគាំទ្រដល់កំណើនសេដ្ឋកិច្ច។
សមាគមធនាគារនៅកម្ពុជា គឺជាសមាគមវិជ្ជាជីវៈក្នុងស្រុក និងធ្វើប្រតិបត្តិការ មិនស្វែងរកប្រាក់ចំណេញ។ សមាគមនេះ ត្រូវបានបង្កើតឡើង ដើម្បីជំរុញការអភិវឌ្ឍប្រព័ន្ធហិរញ្ញវត្ថុនៅកម្ពុជា និងការការពារផលប្រយោជន៍ ស្របច្បាប់របស់សមាជិក។
សមាគមធនាគារអនុវត្តសកម្មភាពរបស់ខ្លួន ដោយមានកិច្ចសហការយ៉ាងជិតស្និទ្ធ ជាមួយអាជ្ញាធរ សមាគម អង្គការ ឬស្ថាប័នក្នុងស្រុក និងអន្តរជាតិ ហើយបម្រើសេវាកម្ម ជាច្រកទំនាក់ទំនងរវាងស្ថាប័នទាំងនោះ ដើម្បីសម្រេចបេសកកម្មរបស់សមាគម។ នេះបើតាមសេចក្តីប្រកាសព័ត៌មាន របស់សមាគមធនាគារនៅកម្ពុជា។
គិតត្រឹមដំណាច់ឆ្នាំ២០២៣ កម្ពុជាមានធនាគារពាណិជ្ជកម្មចំនួន៥៨ និងធនគារឯកទេស៩។
ធនាគារទាំងនេះ មានទ្រព្យសកម្មកើន៧៧,៤ពាន់លានដុល្លារ កើន១៦,៨ភាគរយ ធៀបនឹងឆ្នាំ២០២២។ ក្នុងនោះមាន ឥណទានអតិថិជនដល់ទំហំទឹកប្រាក់៥១,៨ពាន់លានដុល្លារ៕
