ដោយ: គង់ លាងហួរ
អន្តរជាតិ: ធនាគារអភិវឌ្ឍន៍ថ្មី (NDB) ដែលបង្កើតឡើងដោយក្រុមបណ្តាប្រទេស ដែលមានសេដ្ឋកិច្ចកំពុងរីកចម្រើន BRICS គ្រោ ងផ្តល់ប្រាក់កម្ចី ប្រហែល៥ពាន់លានដុល្លារអាមេរិក ក្នុងឆ្នាំ២០២៤នេះ។
លោក Zhou Qiangwu អនុប្រធានធនាគារ NDB បានថ្លែងប្រាប់សារពត៌មាន Reuters នៅខាងក្រៅវេទិកា Boao ប្រចាំឆ្នាំ២០២៤ យ៉ាងដូច្នេះថា “ក្នុងអំឡុងពេលនៃការផ្ទុះជំងឺរាតត្បាត អាជីវកម្មរបស់យើង បានរងផលប៉ះពាល់ ប៉ុន្តែឥឡូវនេះអ្វីៗគ្រប់យ៉ាងកំពុងដំណើរការឡើងវិញ”។
ទោះជាយ៉ាងនេះក្តី លោក Zhou មិនបានបញ្ជាក់លម្អិតអំពីផលប៉ះពាល់ ដែលធនាគារបានប្រឈមមុខនោះទេ ប៉ុន្តែលោកបានអះអាងថា ប្រទេសចិន និងប្រទេសឥណ្ឌា បានទទួលទុនវិនិយោគពីធនាគារ NDB ច្រើនជាងសមាជិកដទៃទៀតតែបន្តិចបន្តួចប៉ុណ្ណោះ។
លោក Zhou ក៏បានមានប្រសាសន៍ឱ្យដឹងផងដែរថា “លោករំពឹងថា សេដ្ឋកិច្ចរបស់ប្រទេសចិន នឹងសម្រេចបានកំណើនប្រហែល៥ភាគរយនៅក្នុងឆ្នាំ២០២៤នេះ ស្របតាមគោលដៅរបស់រដ្ឋាភិបាលចិន”។
ដោយមានទីស្នាក់ការកណ្តាល នៅទីក្រុងសៀងហៃ ធនាគារ NDB ត្រូវបានបង្កើតឡើងក្នុងឆ្នាំ២០១៥ ដោយប្រទេសប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ដែលត្រូវបានគេស្គាល់ថា ជាក្រុមប្រទេសBRICS ។
ធនាគារនេះ ត្រូវបានបង្កើតឡើង ដើម្បីកៀរគរធនធានហិរញ្ញប្បទាន សម្រាប់គម្រោងហេដ្ឋារចនាសម្ព័ន្ធ និងគម្រោងអភិវឌ្ឍន៍ប្រកបដោយចីរភាព នៅក្នុងក្រុមប្រទេស BRICS និងប្រទេសដែលមានសេដ្ឋកិច្ចទីផ្សារកំពុងរីកចម្រើន និងប្រទេសកំពុងអភិវឌ្ឍន៍ (EMDCs)៕
