ដោយៈ គង់ ម៉ាលីនណា
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ មានយុទ្ធសាស្ត្រចំនួន៣ គឺទី១. ជំរុញផលិតកម្មដំណាំស្រូវ ទី២. លើកកម្ពស់បច្ចេកទេសប្រមូលផល និងក្រោយប្រមូលផលស្រូវ និងទី៣. លើកកម្ពស់គុណភាព សុវត្ថិភាព និងកសិធុរកិច្ចស្រូវ-អង្ករ។
ទិសដៅបន្តក្រសួងកសិកម្ម នឹងបន្តជំរុញផលិតកម្ម និងការប្រើប្រាស់គ្រាប់ពូជស្រូវ គុណភាពល្អឱ្យបានទូលំទូលាយ តាមរយៈការពង្រឹងប្រព័ន្ធពូជសុទ្ធ ផ្សារភ្ជាប់នឹងទីផ្សារ តាមរយៈការធ្វើកិច្ចសន្យាកសិកម្ម។
ក្រសួងកសិកម្មក៏បានដាក់ទិសដៅបន្តគាំទ្រ បច្ចេកទេសផលិតកម្មដំណាំស្រូវ និងផលិតកម្មគ្រាប់ពូជស្រូវ ដល់មន្ត្រីកសិកម្មឃុំចំនួន ២៥០នាក់ ដែលទើបតែប្រឡងជាប់ថ្មីៗ និងជំរុញការអនុវត្តបច្ចេកទេសផលិតកម្មដំណាំស្រូវ ប្រកបដោយភាពវៃឆ្លាតនឹងអាកាសធាតុកាត់បន្ថយថ្លៃដើមផលិតកម្ម និងបង្កើនប្រាក់ចំណេញ។
ផែនការមេ សម្រាប់អភិវឌ្ឍន៍អនុវិស័យដំណាំឆ្នាំ២០៣០ បានចង្អុលបង្ហាញ អំពីបំណងបង្កើនផលិតភាពដំណាំស្រូវ ដើម្បីឆ្លើយតបទៅនឹងតម្រូវការទីផ្សារ និងការនាំចេញ តាមរយៈការជំរុញការអនុវត្តទំនើបកម្មកសិកម្ម ខណៈសូចនាករនៃការអភិវឌ្ឍខ្សែច្រវាក់ផលិតកម្មដំណាំស្រូវនៅឆ្នាំ២០៣០ គឺបង្កើនការផលិតស្រូវឱ្យបានជាង១៣លានតោន និងបង្កើនការនាំចេញអង្ករឱ្យបានជាង១លានតោន។
ក្រៅពីនេះក្រសួងក៏មានទិសដៅ ជំរុញការប្រើប្រាស់ និងលើកកម្ពស់ការប្រើប្រាស់ ប្រភេទពូជស្រូវក្នុងស្រុក តាមរយៈការផ្សព្វផ្សាយ និងភ្ជាប់សហគមន៍ផលិតស្រូវ ជាមួយរោងម៉ាស៊ីនកិនស្រូវធំៗក្នុងតំបន់ និងពង្រឹងប្រព័ន្ធគ្រប់គ្រងអាជីវកម្មគ្រាប់ពូជស្រូវ តាមរយៈការចុះបញ្ជីអ្នកផលិត និងធ្វើអាជីវកម្មគ្រាប់ពូជស្រូវ។
លោកស្រីរេប៊ែកកា ប៊ែលតំណាងអង្គការFAOរបស់សហប្រជាតិបានមានប្រសាសន៍ថា ខណៈប្រទេសកម្ពុជា នឹងចាកចេញពីប្រទេសអភិវឌ្ឍន៍តិចតួចបំផុត ក្នុងរយៈពេលមិនយូរនាពេលខាងមុខ ផលប៉ះពាល់នៃពន្ធ និងលទ្ធភាពទទួលបានទីផ្សារ គួរតែត្រូវបានវិភាគ និងឱកាសត្រូវកំណត់ ហើយផែនការសកម្មភាពច្បាស់លាស់ក្នុងការទទួលបាននូវអត្ថប្រយោជន៍ នៃឱកាសពន្ធទាំងនោះក៏គួរតែត្រូវបានធ្វើឡើងឱ្យប្រសើរផងដែរ៕
