ដោយ: គង់ លាងហួរ
ប៉េកាំង: វិស័យបច្ចេកវិទ្យាជាន់ខ្ពស់ កំពុងជំរុញឱ្យតម្រូវការទំនិញ និងសេវាកម្មនៅប្រទេសចិនកើនឡើង ហើយការរួមចំណែករបស់វិស័យនេះ អាចប្រកួតប្រជែងនឹងវិស័យអចលនទ្រព្យ នៅឆ្នាំ២០២៦។នេះបើយោងតាមការចុះផ្សាយដោយសារពត៌មាន Bloomberg Economics។
លោកស្រី Chang Shu និងលោក Eric Zhu សេដ្ឋវិទូប្រចាំនៅស្ថាប័នសារពត៌មាន Bloomberg បានសរសេរក្នុងរបាយការណ៍មួយថា “វិស័យបច្ចេកវិទ្យាជាន់ខ្ពស់មានសក្តានុពល និងអាចក្លាយជាប្រភពនៃកំណើនសេដ្ឋកិច្ច ដ៏សំខាន់ជាងមុនឆ្ងាយណាស់” ។
វិស័យបច្ចេកវិទ្យាជាន់ខ្ពស់ ត្រូវបានគេរំពឹងថា នឹងគ្របដណ្តប់ចំណែកជិត១៩% នៃផលទុនជាតិសរុប(GDP)របស់ប្រទេសចិន នៅឆ្នាំ២០២៦ ដែលនឹងកើនឡើងពីចំណែក១៤,៣% កាលពីឆ្នាំ២០២៣។ បច្ចុប្បន្ននេះ ការរួមចំណែករបស់វិស័យបច្ចេកវិទ្យាក្នុងទំហំផលទុនជាតិសរុបរបស់ប្រទេសចិន ជិតស្មើនឹងវិស័យអចលនទ្រព្យរួចទៅហើយ។
ទីក្រុងប៉េកាំងកំពុងស្វែងរកប្រភពថ្មី សម្រាប់ជំរុញកំណើនសេដ្ឋកិច្ចជាតិ ខណៈដែលរដ្ឋាភិបាលចិនកំពុងខិតខំ កាត់បន្ថយការពឹងផ្អែកខ្លាំងពេក ទៅលើវិស័យអចលនទ្រព្យ ដែលកំពុងជាប់ផុងក្នុងវិបត្តិយ៉ាងធ្ងន់ធ្ងរ។
ក្រុមមន្ត្រីចិនកំពុងបន្តស្វែងរក “ការអភិវឌ្ឍន៍ដែលមានគុណភាពខ្ពស់” ដែលនឹងផ្តោតលើការផលិតបច្ចេកវិទ្យាជាន់ខ្ពស់ និងបច្ចេកវិទ្យាច្នៃប្រឌិត ដូចជា បច្ចេកវិទ្យាព័ត៌មាន ទិន្នន័យធំ និងបញ្ញាសិប្បនិម្មិតជាដើម។
ក្រុមសេដ្ឋវិទូបានបញ្ជាក់ឱ្យដឹងថា កាលពីឆ្នាំ២០២៣កន្លងទៅ វិស័យបច្ចេកវិទ្យាជាន់ខ្ពស់ នៅក្នុងប្រទេសចិន សម្រេចបានទំហំទឹកប្រាក់ចំនួន១៨ទ្រីលានយ័ន ដែលស្មើនឹងចំណែកប្រហែល១៤,៣% នៃផលទុនជាតិសរុបរបស់ប្រទេសចិន។
ចំណែកឯ វិស័យអចលនទ្រព្យក្នុងឆ្នាំ២០២៣ បានគ្របដណ្តប់ចំណែកប្រមាណ២០,១ភាគរយ នៃផលទុនជាតិសរុបរបស់ប្រទេសចិន។
ប៉ុន្តែក្រុមសេដ្ឋវិទូព្យាករថា សមាមាត្រនេះនឹងប្រែប្រួល នាពេលអនាគតដ៏ខ្លីខាងមុខ ខណៈបច្ចុប្បន្ននេះ វិស័យអចលនទ្រព្យកំពុងស្ថិតក្នុងស្ថានភាពវិបត្តិដ៏ជ្រៅ៕
