ដោយៈ និស្ស័យ
ភ្នំពេញៈ ធនាគារជាតិនៃកម្ពុជា(NBC) បានចុះអនុស្សរណៈនៃការយោគយល់គ្នា(MOU) ជាមួយសមាគមធនាគារកម្ពុជា(ABC)លើការផ្សព្វផ្សាយប្រវត្តិសាស្រ្តទាក់ទងសេដ្ឋកិច្ច និងរូបិយវត្ថុនៅកម្ពុជា។
ពិធីចុះ MoU នេះ ត្រូវបានធ្វើឡើងកាលពីថ្ងៃទី ២០ ខែមីនា ឆ្នាំ ២០២៤ នៅសារមន្ទីរ ស.ស.រ ដោយមានការចូលរួមពីសំណាក់លោកស្រី ជា សិរី អគ្គទេសាភិបាលធនាគារជាតិនៃកម្ពុជា។ នេះបើតាមសេចក្តីប្រកាសព័ត៌មានរួមនៃស្ថាប័នទាំង២។
ប្រធានសមាគមធនាគារនៅកម្ពុជា លោក Raymond Siaបាននិយាយថា ការផ្សព្វផ្សាយ និងការផ្តល់ចំណេះដឹងអំពីហិរញ្ញវត្ថុទៅដល់ប្រជាពលរដ្ឋ គឺពិតជាមានសារៈសំខាន់ណាស់។
លោកបានថ្លែងថា “យើងជឿជាក់ថា ការអប់រំនឹងបង្កើនចំណេះដឹង ហើយកិច្ចសហការនេះ គឺជាការវិនិយោគផ្ទាល់លើស្ថិរភាព ភាពរឹងមាំ និងភាពធន់ផ្នែកហិរញ្ញវត្ថុនាពេលអនាគត នៃវិស័យធនាគារ ក៏ដូចជា សុខុមាលភាពរបស់ប្រជាពលរដ្ឋកម្ពុជាដែរ”។
ចំណែកសហប្រធាននៃសារមន្ទីរ ស.ស.រ លោក Blaise Kilian បានលើកឡើងថា កិច្ចសហប្រតិបត្តិការដ៏សំខាន់នេះ នឹងផ្តល់ឱកាសដល់គ្រឹះស្ថានអប់រំរដ្ឋនាំសិស្សានុសិស្ស រាប់ពាន់នាក់មកកាន់សារមន្ទីរ ស.ស.រ នៅក្នុងឆ្នាំខាងមុខនេះ។
លោកបញ្ជាក់ថា “ខ្ញុំសូមអរគុណ ចំពោះការគាំទ្ររបស់សមាគមធនាគារនៅកម្ពុជា និងសមាជិកដែលបានបង្ហាញ ពីការប្តេជ្ញាចិត្តរបស់ពួកគាត់ ក្នុងការលើកកម្ពស់ការអប់រំផ្នែកហិរញ្ញវត្ថុ ដែលជាកត្តាសំខាន់មួយ សម្រាប់កំណើនសេដ្ឋកិច្ច ប្រកបដោយបរិយាបន្ននៅកម្ពុជា”។
យោងតាមសេចក្តីប្រកាសព័ត៌មាន MoU នេះ ត្រូវបានធ្វើឡើងក្រោមគំនិតផ្តួចផ្តើមសំខាន់ៗចំនួន ៣ រួមមាន ១. មូលនិធិរួមសម្រាប់ដំណើរទស្សនកិច្ចសិក្សា ដោយ ABC នឹងអំពាវនាវឱ្យសមាជិករបស់ខ្លួនផ្ដល់មូលនិធិ ដើម្បីគាំទ្រការទៅទស្សនកិច្ចសារមន្ទីរ ស.ស.រ, ទី២ ការផ្តល់នូវទស្សនកិច្ច ២ដងក្នុង ១ ឆ្នាំ ដោយ ABC នឹងផ្តល់ហិរញ្ញប្បទានសម្រាប់ដំណើរទស្សនកិច្ចទៅកាន់សារមន្ទីរ ស.ស.រ សម្រាប់សិស្សានុសិស្សនៅតាមគ្រឹះស្ថានអប់រំរដ្ឋក្នុងឆ្នាំ២០២៤, និងទី៣ ការលើកកម្ពស់ភាពទទួលខុសត្រូវសង្គមរបស់សាជីវកម្មក្នុងវិស័យធនាគារកម្ពុជា។
អគ្គទេសាភិបាលធនាគារជាតិនៃកម្ពុជា លោកស្រី ជា សិរី បានឱ្យដឹងថា ការយល់ដឹងពីប្រវត្តិសាស្ត្រទូទៅ ជាពិសេសប្រវត្តិសាស្ត្រផ្នែកសេដ្ឋកិច្ច និងរូបិយវត្ថុ គឺពិតជាចាំបាច់ សម្រាប់យុវជនជំនាន់ក្រោយ ដើម្បីស្វែងយល់ពីអតីតកាល និងដើម្បីផ្តល់ជាមូលដ្ឋានគ្រឹះក្នុងការសម្រេចចិត្ត សម្រាប់ពេលបច្ចុប្បន្ន ដែលនឹងកំណត់អនាគតរបស់យើង។
លោកស្រីបានថ្លែងថា “វាជាកត្តាសំខាន់ដែលមនុស្សគ្រប់រូប គួរទទួលចំណេះដឹងតាមរយៈការអប់រំ និងវប្បធម៌ ទាំងនៅក្នុងនិងក្រៅសាលា”៕