ដោយ: គង់ លាងហួរ
អន្តរជាតិ: មន្ត្រីជាន់ខ្ពស់សិង្ហបុរីបានព្រមានថា ភាពមិនច្បាស់ លាស់ខាងសេដ្ឋកិច្ច នឹងជះផលប៉ះពាល់ដល់ឧស្សាហកម្មអចលនទ្រព្យរបស់ប្រទេសនេះ ដោយសារតម្រូវការ និងការលក់ផ្ទះនៅក្នុងទីក្រុងបង្ហាញពីការធ្លាក់ចុះ។
លោក Desmond Lee រដ្ឋមន្ត្រីក្រសួងអភិវឌ្ឍន៍ជាតិ បានថ្លែងក្នុងបទសម្ភាសន៍ជាមួយនឹងទូរទស្សន៍ CNA ថា“ទស្សនវិស័យសេដ្ឋកិច្ចស្ថិតក្នុងភាពមិនច្បាស់ ហើយវាមិនទំនងជាអំណោយផលនោះទេ”។
លោករដ្ឋមន្ត្រីបានបន្តថា “យើងមើលឃើញថា អត្រាការប្រាក់នៅតែមានកម្រិតខ្ពស់ក្នុងរយៈពេលយូរ។ យើងមើលឃើញភាពមិនប្រាកដប្រជាខាងផ្នែកសេដ្ឋកិច្ច ក្នុងផ្លូវខាងមុខរបស់យើង”។លោកបន្ថែមថា “យើងមើលឃើញភាពតានតឹង ខាងភូមិសាស្ត្រនយោបាយ ហើយអ្វីទាំងអស់នេះ នឹងជះឥទ្ធិពលមកលើវិស័យអចលនទ្រព្យ”។
រដ្ឋមន្ត្រីក្រសួងអភិវឌ្ឍន៍ជាតិ នៃប្រទេសសិង្ហបុរីរូបនេះបានលើកឡើងក្នុងបទសម្ភាសន៍នោះថា“យើងនឹងត្រួតពិនិត្យ និងចាត់វិធានការណាក៏ដោយដែលចាំបាច់ ដើម្បីធានាបាននូវស្ថិរភាព នៅក្នុងទីផ្សារអចលនទ្រព្យរបស់យើង”។
លោក Lee បានបញ្ជាក់ថា រដ្ឋាភិបាលបាននិងកំពុងខិតខំធ្វើការ ក្នុងរយៈពេលប៉ុន្មានឆ្នាំចុងក្រោយនេះ ដើម្បីស្ដារស្ថិរភាពក្នុងទីផ្សារលំនៅដ្ឋាន និងធ្វើឱ្យមានតុល្យភាពរវាងការផ្គត់ផ្គង់ និងតម្រូវការផ្ទះល្វែង ក្រោយពីមានការរំខាន ដែលបណ្តាលមកពីជំងឺរាតត្បាតកូវីដ-១៩។
លោកអះអាងថា “វិបត្តិជំងឺរាតត្បាតនាពេលកន្លងទៅ បានបង្កការរំខានដល់ការរស់នៅរបស់ប្រជាជន ជះផលប៉ះពាល់ដល់ខ្សែសង្វាក់ផ្គត់ផ្គង់ បណ្តាលឱ្យមានការខ្វះខាតកម្លាំងពលកម្ម និងប៉ះពាល់យ៉ាងខ្លាំងដល់វិស័យសំណង់ និងអចលនទ្រព្យ”។
លោកបញ្ជាក់បន្ថែមថា យើងត្រូវការពេលវេលា ដើម្បីស្ដារតុល្យភាពទីផ្សារ ពីព្រោះការចាក់បញ្ចូលការផ្គត់ផ្គង់ ការផ្លាស់ប្តូរចិត្តសាស្ត្រទីផ្សារអចលនទ្រព្យ និងការកែសម្រួលវិធានការផ្សេងៗ សុទ្ធតែត្រូវការពេលវេលា ដើម្បីលេចចេញជារូបរាងឡើងបន្តិចម្តងៗ”៕