ដោយៈ គង់ ម៉ាលីនណា
ភ្នំពេញៈ ប្រតិភូការិយាល័យអង្គការសហប្រជាជាតិ សម្រាប់សេវាកម្មគម្រោង (UNOPS) ទទួលបានការអនុញ្ញាតឱ្យចូលជួបសម្តែងការគួរសម និងពិភាក្សាការងារជាមួយ លោករដ្ឋមន្ត្រីក្រសួងសាធារណការ និងដឹកជញ្ជូន។
លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអនុញ្ញាតឱ្យប្រតិភូ នៃការិយាល័យអង្គការសហប្រជាជាតិសម្រាប់សេវាកម្មគម្រោង (United Nations Office for Project Services – UNOPS) ដឹកនាំដោយ អ្នកនាង អ៊ីដា ក្រាចា (Ms. Eda KRAJA) អ្នកគ្រប់គ្រងប្រចាំប្រទេសកម្ពុជា និងឡាវ ចូលជួបសម្តែងការគួរសម និងពិភាក្សាការងារ ដោយមានការចូលរួមពី លោកជំទាវ ឯកឧត្តម ជាថ្នាក់ដឹកនាំក្រសួង និងមន្ត្រីពាក់ព័ន្ធមួយចំនួនទៀត។
គោលបំណងនៃជំនួបនាឱកាសនេះ គឺដើម្បីជាការណែនាំខ្លួនពីសំណាក់ អ្នកគ្រប់គ្រងប្រចាំប្រទេសរបស់ UNOPS ដែលទើបទទួលបានតែងតាំងថ្មី និងកិច្ចពិភាក្សាអំពីលទ្ធភាព និងឱកាសនៃការបង្កើតកិច្ចសហប្រតិបត្តិការនាពេលអនាគត ជាមួយក្រសួងសាធារណការ និងដឹកជញ្ជូន លើគម្រោងនានាដែលអាចត្រូវការជំនួយហិរញ្ញវត្ថុ និងជំនួយបច្ចេកទេសពីUNOPS ដើម្បីជាការចូលរួមអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន ភស្តុភារកម្ម និងសុវត្ថិភាពផ្លូវថ្នល់នៅកម្ពុជា៕
