ដោយៈ គង់ ម៉ាលីនណា
ភ្នំពេញៈ គម្រោងអភិវឌ្ឍន៍ជលផល ក្រោយប្រមូលផល (CAPFish-Capture) បានគាំទ្រដល់សហគ្រាសចំនួន២៨ ជាជំនួយបច្ចេកទេស និងសម្ភារបរិក្ខារ ទៅដល់សហគ្រាសនីមួយៗដែលមានតម្លៃចាប់ពី២៥,០០០ដុល្លារ ដល់១០០,០០០ដុល្លារអាមេរិក ដើម្បីកែលម្អប្រតិ្តបត្តិការអាជីវកម្ម និងអនុវត្តស្តង់ដារសុវត្ថិភាពម្ហូបអាហារ CQS ។
លោកពុំ សុថា ប្រតិភូរាជរដ្ឋាភិបាលទទួលបន្ទុក ជាអគ្គនាយករដ្ឋបាលជលផលបានគូសបញ្ជាក់ ជាមួយអ្នកសារព័ត៌មានបែបនេះ នៅមុនដំណើរទស្សនកិច្ចសិក្សា និងផ្សព្វផ្សាយអំពីសហគ្រាសជលផលក្រោយប្រមូលផល ដែលទទួលផលពីគម្រោង CAPFish នៅតាមរាជធានីខេត្តចំនួន៤ ដូចជា រាជធានីភ្នំពេញ កណ្ដាល កំពង់ធំ និងសៀមរាប។
លោកពុំ សុថា បានឱ្យដឹងទៀតថា មានសហគ្រាសចំនួន០៨ ទទួលបាននិមិត្តសញ្ញាគុណភាព ផលផលិតផលជលផលកម្ពុជា CQS ដែលក្នុងនោះនិមិត្តសញ្ញាគុណភាពផលិតផលជលផលកម្ពុជាពេញលេញចំនួន៤ និងនិមិត្តសញ្ញាគុណភាពផលិតផលជលផលកម្ពុជាធម្មតាចំនួន៤។
កញ្ញាអ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្មបានឱ្យដឹងថា ក្រសួងកសិកម្មបានបង្កើតវប្បធម៌ សុវត្ថិភាពម្ហូបអាហារ និងបានរៀបចំបង្កើត និងដាក់អោយប្រើប្រាស់ និមិត្តសញ្ញាគុណភាពផលិតផលជលផលកម្ពុជា (CQS) សម្រាប់លើកទឹកចិត្ត ឱ្យវិស័យឯកជនអនុវត្ត ដើម្បីឆ្លើយតបតាមតំរូវការទីផ្សារទាំងក្នុងតំបន់និងអន្តរជាតិ។
ជាមួយគ្នានេះ និមិត្តសញ្ញាគុណភាពផលិតផលជលផលកម្ពុជា(CQS) ត្រូវបានដាក់ឱ្យប្រើប្រាស់ ជាផ្លូវការនាពេលថ្មីៗនេះ ដើម្បីរួមចំណែកលើកកម្ពស់ ពាណិជ្ជកម្មផល ផលិតផលជលផល។ បន្ថែមពីនេះ ក្រសួងកសិកម្ម នឹងមិនបញ្ឈប់ត្រឹមនេះទេ ដោយនិមិត្តសញ្ញាគុណភាពផលិតផលជលផលកម្ពុជា(CQS) អាចនឹងត្រូវបានប្រើប្រាស់សម្រាប់ ផលិតផលកសិកម្មផ្សេងទៀត ផ្អែកលើបទពិសោធន៍ជោគជ័យ និងកិច្ចសហការជាមួយអង្គការ UNIDO៕