តម្លៃ​ប្រេង​ឆៅលើទីផ្សារអន្តរជាតិបាន​កើនឡើង​នៅ​ថ្ងៃ​សុក្រ​នេះ

ដោយ: គង់ លាងហួរ
អន្តរជាតិ: តម្លៃ​ប្រេង​ឆៅបាន​កើនឡើង​តិចតួច​ក្នុងការជួញដូរនៅ​ព្រឹក​ថ្ងៃ​សុក្រ​នេះ បន្ទាប់​ពី​បាន​កើនឡើង​ជាង៣ភាគរយ ក្នុង​វគ្គ​មុន ដោយសារ​ភាព​តានតឹង​ពាណិជ្ជកម្ម​រវាង​​សហរដ្ឋអាមេរិក និង​ចិន​បាន​បង្ហាញ​សញ្ញា​នៃការថយចុះ។

តួយ៉ាង តម្លៃប្រេងឆៅ Brent បានកើនឡើង៧សេន ឬ០,១% ដល់៦២,៩១ដុល្លារក្នុងមួយបារ៉ែល ខណៈតម្លៃប្រេងឆៅ West Texas Intermediate របស់អាមេរិក បានកើនឡើង៧សេនដូចគ្នាដល់៥៩,៩៨ដុល្លារក្នុងមួយបារ៉ែលគិតត្រឹមម៉ោងសកល 0121 GMT ។

គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ តម្លៃប្រេងឆៅ Brent បានកើនឡើង២,៨ភាគរយ ឬ១,៧២ដុល្លារក្នុងមួយបារ៉ែល ហើយតម្លៃប្រេងឆៅ WTI បានកើនឡើង៣,២ភាគរយ ឬ១,៨៤ដុល្លារក្នុងមួយបារ៉ែល៕