ដោយៈ គង់ ម៉ាលីនណា
ភ្នំពេញៈ តម្លៃពោតក្រហមនៅក្នុងខេត្តបាត់ដំបង នាពាក់កណ្តាលរដូវកាលប្រមូលផលឆ្នាំ២០២៣ បានកើនឡើងតិចតួច បើធៀបរយៈពេលដូចគ្នាឆ្នាំមុន។
អាកាសធាតុធ្វើឱ្យគុណភាពពោតក្រហម ក្នុងឆ្នាំនេះធ្លាក់ចុះបន្តិច។ នេះបើយោងតាមម្ចាស់សៃឡូ និងអ្នកនៅក្នុងផលិតកម្មពោតក្រហម ខេត្តបាត់ដំបង ដែលជាច្រកនាំចេញសំខាន់មួយរបស់កម្ពុជាទៅទីផ្សារអន្តរជាតិ។
រៀងរាល់ឆ្នាំការប្រមូលផលពោតក្រហម ត្រូវធ្វើឡើងចំនួន២ លើក ដោយលើកទី១ ចាប់ពីដើមខែកក្កដា ដល់ខែសីហា និងលើកទី២ ពីចុងខែតុលា ដល់ខែកុម្ភៈ នៃឆ្នាំបន្ទាប់។
ម្ចាស់សៃឡូ (កន្លែងទិញកសិផល) នៅស្រុកសំពៅលូន ខេត្តបាត់ដំបង អ្នកស្រីចាន់ មួយ បានមានប្រសាសន៍ឲ្យដឹងថា ការប្រមូលផលពោតក្រហម បានចាប់ផ្តើមជាង១ខែមកហើយ ដោយតម្លៃដែលកន្លែងអ្នកស្រីទិញពីប្រជាកសិករ (ថ្ងៃទី ២១ ខែសីហា) គឺពោតក្រហមជាប់ស្នូលមានតម្លៃពី៥,៦-៥,៧ បាត (៦៥០-៦៦៥ រៀល) ក្នុង១គីឡូក្រាម និងពោតស្ងួតតម្លៃ១០,៥ បាត (១ ២២៥ រៀល)។
តម្លៃនេះគឺកើន ០,១ បាត (១១ រៀល) បើធៀបនឹងរយៈពេលដូចគ្នាក្នុងឆ្នាំ ២០២២។
អ្នកស្រីបន្តទៀតថា បើតាមព័ត៌មានអ្នកស្រីទទួលបាន គឺផ្ទៃដីដាំពោតក្នុងឆ្នាំនេះ អាចលើសពីឆ្នាំមុនបន្តិច ប៉ុន្តែគុណភាពគ្រាប់ពោត គឺធ្លាក់ចុះបន្តិច ដោយសារកត្តាអាកាសធាតុ។ ទោះយ៉ាងណាតម្លៃឆ្នាំនេះមិនក្រោមឆ្នាំមុនឡើយ។
លោកស្រីចាន់ មួយ បានអះអាងថា សម្រាប់តម្លៃពោតក្រហមក្នុងឆ្នាំនេះ គឺកើនលើសឆ្នាំមុនបន្តិច ប៉ុន្តែគុណភាពអន់ជាងឆ្នាំមុនតិចតួចដែរ។
ពោតក្រហមដែលកន្លែងអ្នកស្រី ទិញពីប្រជាកសិករខ្មែរ គឺត្រូវបាននាំចេញទៅលក់បន្តនៅប្រទេសថៃ ដើម្បីកែច្នៃជាផលិតផលចំណីអាហារ និងមួយចំនួនធ្វើជាចំណីសត្វ។
មន្ត្រីនៃមន្ទីរកសិកម្មខេត្តបាត់ដំបង លោកហេង សិទ្ធិ បានឱ្យដឹងថា បើគិតត្រឹមចុងសប្តាហ៍ទី៣ (ថ្ងៃ ១៩) ខែសីហា ការប្រមូលផលពោតក្នុងខេត្តបាត់ដំបង សម្រេចបានប្រហែល៨០ភាគរយ ហើយលើផ្ទៃដីសរុបជាង៧ម៉ឺនហិកតា។
លោកបន្តថា ទិន្នផលឆ្នាំនេះ គឺកន្លែងខ្លះកើនដល់៧តោន ក្នុង១ ហិកតា ប៉ុន្តែភាគច្រើនគឺនៅចន្លោះពី ៣-៤ តោនប៉ុណ្ណោះ។
លោកបានបញ្ជាក់ថា នេះគ្រាន់តែជាទិន្នន័យបឋមប៉ុណ្ណោះ ដោយមន្ត្រីជំនាញ កំពុងរៀបចំស្រង់ទិន្នន័យជារួម អំពីស្ថានភាពការដាំដុះ និងការប្រមូលផល៕
