ដោយៈ គង់ ម៉ាលីនណា
ភ្នំពេញៈ អតីតរដ្ឋមន្ត្រីក្រសួងពាណិជ្ជកម្ម លោកប៉ាន សូរស័ក្តិ បានថ្លែងពីគោលបំណងនៃការបោះផ្សាយសៀវភៅRCEP ដោយឈរលើមូលដ្ឋានមួយចំនួន។
លោកអះអាងថា ការបោះពុម្ពផ្សាយសៀវភៅ ដែលមានចំណងជើងRCEP ផ្នែកទី ១ ភូមិសាស្ត្រនយោបាយ ភូមិសាស្ត្រសេដ្ឋកិច្ច និងការវិភាគផ្នែកច្បាប់ នឹងបម្រើដល់ផ្នែកឯកជន ក្នុងការទាញយកអត្ថប្រយោជន៍ ពីកិច្ចព្រមព្រៀងដ៏ធំមួយនេះ ហើយក៏អាចឱ្យផ្នែកឯកជនទទួលបានប្រភពនៃកំណើនថ្មី ដើម្បីបង្កើតភាពរុងរឿងសម្រាប់ប្រទេស។
លោកថ្លែងបែបនេះ នៅក្នុងពិធីសម្ពោធការបោះពុម្ពផ្សាយសៀវភៅនេះ កាលពីថ្ងៃទី១៩ ខែសីហា ឆ្នាំ ២០២៣ នៅសាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា។
សៀវភៅស្តីពីRCEP ផ្នែកទី១ ភូមិសាស្ត្រនយោបាយ ភូមិសាស្ត្រសេដ្ឋកិច្ច និងការវិភាគផ្នែកច្បាប់” នេះត្រូវបាននិពន្ធរួមគ្នាដោយ លោកសាស្ត្រាចារ្យ សុក ស៊ីផាន់ណា ប្រធានក្រុមប្រឹក្សាភិបាលនៃវិទ្យាស្ថានចក្ខុវិស័យអាស៊ី និងលោកស្រី សុខ រ៉ូហ្សេត ប្រធាននៃវិទ្យាស្ថានចក្ខុវិស័យអាស៊ី។
លោក សូរស័ក្តិ បានលើកឡើងថា “សៀវភៅនេះពិតជាមានសារៈសំខាន់ខ្លាំងណាស់ ខណៈRCEP ជាប្រធានបទដែលលោកស្រឡា ញ់ពេញចិត្តយ៉ាងខ្លាំង នៅក្នុងអាណត្តិជារដ្ឋមន្ត្រីក្រសួងពាណិជ្ជកម្ម។
លោកថ្លែងថា RCEP ត្រូវបានគេរំពឹងថា នឹងដើរតួយ៉ាងសំខាន់ក្នុងការធ្វើសមាហរណកម្មអាស៊ាន ទៅក្នុងសេដ្ឋកិច្ចពិភពលោក ជំរុ ញកំណើនសេដ្ឋកិច្ចប្រកបដោយចីរភាព បរិយាប័ន្ន និងភាពធន់ ទប់ទល់នឹងទំនោរ នៃការប្រឆាំងសកលភាវូបនីយកម្ម និងការការពារនិយម ហើយក៏ជាប្លុកពាណិជ្ជកម្មដ៏ធំបំផុត ក្នុងពិភពលោកនាពេលបច្ចុប្បន្ន ដែលមាន១៥ប្រទេស ជាមួយនឹងផលិតផលក្នុងស្រុកសរុប ២៦,២ ទ្រីលានដុល្លារ។
លោកប៉ាន សូរស័ក្តិ បានលើកឡើងថា RCEP តំណាងឱ្យ៣០ ភាគរយនៃផលិតផល ក្នុងស្រុកសរុបរបស់ពិភពលោក។ ចំនួន២៨ភាគរយនៃពាណិជ្ជកម្មពិភពលោក និង៣២,៥ភាគរយនៃការវិនិយោគសកល៕
