ដោយៈ ម៉ាលីនណា
ភ្នំពេញៈ ប្រទេសឥណ្ឌូនេស៊ី បានបង្ហាញពីគោលបំណង ក្នុងការទិញអង្ករពីកម្ពុជា និងបណ្តាប្រទេសផ្សេងៗទៀត ដើម្បីធានាដោះស្រាយបញ្ហាសន្តិសុខស្បៀង នៅក្នុងប្រទេសរបស់ខ្លួនផង និងពង្រឹងកិច្ចសហប្រតិបត្តិការ នៅក្នុងវិស័យពាណិជ្ជកម្ម រវាងប្រទេសទាំង២ផងដែរ។
ព័ត៌មាននេះ បានធ្វើឡើងនៅក្នុងជំនួបរវាងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាមួយលោកអនុរដ្ឋមន្ដ្រីក្រសួងការបរទេសឥណ្ឌូនេស៊ីលោកPahala Nugraha Mansury និងគណៈប្រតិភូ នៅទីស្ដីការក្រសួង កាលពីថ្ងៃទី១៥ ខែសីហា ឆ្នាំ២០២៣។
កិច្ចពិភាក្សាដែលធ្វើឡើងតែ៥ថ្ងៃប៉ុណ្ណោះ ក្រោយជំនួបតាមទូរស័ព្ទរវាងលោកនាយករដ្ឋមន្ដ្រីហ៊ុន សែន ជាមួយលោកប្រធានាធិបតីឥណ្ឌូនេស៊ី ចូកូ វីដូដូ ដែលបានបញ្ជាក់អំពីបំណង ក្នុងការនាំអង្ករពីកម្ពុជាទៅកាន់ឥណ្ឌូនេស៊ី។
នៅក្នុងកិច្ចប្រជុំនេះ លោកអនុរដ្ឋមន្ដ្រី Pahala Nugraha Mansury បានសង្កត់ធ្ងន់ពីការយកចិត្តទុកដាក់ អំពីសន្តិសុខស្បៀងនៅក្នុងប្រទេស និងបានចាប់អារម្មណ៍អំពីភាពចាំបាច់ ក្នុងការស្វែងរកទីផ្សារអង្ករបន្ថែមពីប្រទេសផ្សេងៗ ដែលក្នុងនោះក៏មានកម្ពុជាផងដែរ ដើម្បីធានាសន្តិសុខស្បៀងសម្រាប់ប្រទេសឥណ្ឌូនេស៊ី។
តាមរយៈក្រសួងកសិកម្ម លោកPahala Nugraha Mansury បានលើកឡើងថា “វត្តមានអង្កររបស់កម្ពុជា នៅលើទីផ្សារឥណ្ឌូនេស៊ីនឹងក្លាយជាសក្ខីភាពថ្មីមួយទៀត ក្នុងការបញ្ជាក់អំពីកិច្ចសហប្រតិបត្តិការរវាងប្រទេសទាំង២ នៅក្នុងវិស័យពាណិជ្ជកម្ម ខណៈកម្ពុជាមានអង្ករដែលមានគុណភាពល្អ និងជាពិសេសមានការទទួលស្គាល់ និងនាំចូលដោយប្រទេស ជាសមាជិកអាស៊ានចំនួន៨ ក្នុងចំណោមសមាជិកទាំង១០ប្រទេស”។
ជាការឆ្លើយតប លោក ឌិត ទីណា បានបញ្ជាក់ពីគោលជំហររបស់កម្ពុជា ក្នុងការជួយដល់មិត្ត ដែលកំពុងមានតម្រូវការស្របតាមប្រសាសន៍ណែនាំពីនាយករដ្ឋមន្ត្រីកម្ពុជា។
លោកបានបន្ថែមថា ក្រសួងកសិកម្មកម្ពុជា នឹងជួយសម្រួលដល់ការនាំចេញអង្ករ ដើម្បីទ្រទ្រង់ដល់សន្តិសុខស្បៀងសម្រាប់ប្រទេសឥណ្ឌូនេស៊ីជាមិត្ត។ ការងារនេះក៏នឹងមានការសហការគាំទ្រ ពីវិស័យឯកជនកម្ពុជា ដែលមានសហព័ន្ធស្រូវអង្ករជាតួអង្គសំខាន់។
កាលពីថ្ងៃទី១១ ខែសីហា ឆ្នាំ២០២៣កន្លងទៅ ក្នុងជំនួបពិភាក្សាការងារតាមប្រព័ន្ធទូរស័ព្ទ រវាងសម្តេចតេជោហ៊ុន សែន នាយករដ្ឋមន្ត្រីនៃកម្ពុជា និងប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) បានផ្ដោតការយកចិត្តទុកដាក់ ទៅលើបញ្ហាសន្តិសុខស្បៀង ដែលក្នុងនោះលោកប្រធានាធិបតីឥណ្ឌូនេស៊ី បានបញ្ជាក់ពីបំណងក្នុងការនាំអង្ករចេញពីកម្ពុជា ហើយនៅពេលដ*ខ្លីខាងមុខនេះ លោកសូមអនុញ្ញាតពីលោក ហ៊ុន សែន ដើម្បីបញ្ជូនប្រតិភូមកពិភាក្សាលើករណីនេះ៕
