ដោយ: គង់ លាងហួរ
សិង្ហបុរី: តម្លៃផ្ទះឯកជននៅប្រទេសសិង្ហបុរី បានធ្លាក់ចុះ០,២ភាគរយ នៅក្នុងត្រីមាសទី២ ឆ្នាំ២០២៣នេះ។ នេះបើយោងតាមស្ថិតិអចលនទ្រព្យ ដែលចេញផ្សាយដោយអាជ្ញាធរអភិវឌ្ឍទីក្រុង (URA) កាលពីថ្ងៃសុក្រ ទី២៨ ខែកក្កដា។
អត្រានៃការធ្លាក់ចុះនេះ មានកម្រិតទាបជាងការប៉ាន់ប្រមាណ ដែលបានចេញផ្សាយ កាលពីដើមខែកក្កដានេះបន្តិច ពោលគឺគេបានព្យាករថា តម្លៃផ្ទះឯកជននឹងធ្លាក់ចុះ ចំនួន០,៤ភាគរយ នៅត្រីមាសទី២។
លោកស្រី Christine Sun អនុប្រធានជាន់ខ្ពស់ផ្នែកស្រាវជ្រាវ និងវិភាគប្រចាំនៅក្រុមហ៊ុន OrangeTee & Tie បានមានប្រសាសន៍ថា “នេះជាលើកទីមួយហើយ ដែលតម្លៃផ្ទះឯកជនបានធ្លាក់ចុះបើគិតចាប់តាំងពីត្រីមាសទីមួយនៃឆ្នាំ២០២០”។
ឥឡូវនេះ សន្ទស្សន៍តម្លៃ URA សម្រាប់អចលនទ្រព្យឯកជនគឺស្ថិតនៅត្រឹម១៩៤,៤ពិន្ទុ ដែលធ្លាក់ចុះពី១៩៤,៨ពិន្ទុ នៅក្នុងត្រីមាសទី១។
យោងតាមទិន្នន័យចុងក្រោយនេះបានបង្ហាញថា តម្លៃនៃអចលនទ្រព្យបែបខុនដូ និងអាផាតម៉ិន(Non-landed properties)បានធ្លាក់ចុះ០,៦ភាគរយ នៅក្នុងត្រីមាសទីពីរ ដែលខុសផ្ទុយស្រឡះពីការកើនឡើង២,៦ភាគរយនៅក្នុងត្រីមាសមុន។
ចំណែកតម្លៃអចលនទ្រព្យប្រភេទជាប់ដី (Landed properties) បានកើនឡើង ត្រឹមតែ១,១ភាគរយប៉ុណ្ណោះ នៅត្រីមាសទី២ បើធៀបទៅនឹងការកើនឡើង៥,៩ភាគរយ នៅក្នុងត្រីមាសទីមួយ។
លោកស្រី Sun បានបន្ថែមថា “ការថយចុះនៃកំណើនតម្លៃផ្ទះអាចបណ្តាលមកពីវិធានការអចលនទ្រព្យ ដែលបានដាក់អនុវត្តនៅក្នុងខែកញ្ញា ឆ្នាំ២០២២ និងខែមេសា ឆ្នាំ២០២៣ ដែលវិធានការនោះបានដំឡើង នូវពន្ធប្រថាប់ត្រារបស់អ្នកទិញផ្ទះបន្ថែម (ABSD) និងផលប៉ះពាល់ទៅលើសមត្ថភាពខ្ចីប្រាក់”៕
