ដោយៈ និស្ស័យ
ភ្នំពេញៈ កម្ពុជារកប្រាក់បានជិត៣៣២ លានដុល្លារ ពីការនាំចេញកង់ទៅទីផ្សារអន្តរជាតិ នៅក្នុងឆមាសទី១ ឆ្នាំ ២០២៣ ធ្លាក់ចុះជិត១/៣ បើធៀបរយៈពេលដូចគ្នាឆ្នាំមុន។ នេះបើតាមក្រសួងពាណិជ្ជកម្ម។
ទិន្នន័យនាំចេញទំនិញ ទៅក្រៅប្រទេសបានបង្ហាញថា ពីខែមករា-ខែមិថុនា ឆ្នាំ ២០២៣ កម្ពុជាបាននាំចេញកង់ ក្នុងទឹកប្រាក់សរុប ៣៣១,៩៥លានដុល្លារ ធ្លាក់ចុះ៣០,៥២ ភាគរយបើធៀបនឹងឆមាសទី ១ ឆ្នាំ ២០២២ ដែលមានចំនួន ៤៧៧,៧៤ លានដុល្លារ។
បើតាមក្រសួងពាណិជ្ជកម្មបានឲ្យដឹងទៀតថា ក្រៅពីនាំចេញកង់ កម្ពុជាក៏នាំចេញគ្រឿងបន្លាស់កង់ផងដែរ គឺចំនួន៥៥២,៣៣២ដុល្លារ។
អ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានមានប្រសាសន៍ថា ការធ្លាក់ចុះទឹកប្រាក់នាំចេញកង់ កាលពីឆមាសទី១ គឺដោយសារតែកំណើនសេដ្ឋកិច្ចពិភពលោក ជាពិសេសប្រទេស ដែលបញ្ជាទិញកង់ពីកម្ពុជាជួបបញ្ហា ដែលជំរុញឱ្យប្រទេសនីមួយៗកាត់បន្ថយការចំណាយមិនចាំបាច់។ក្រៅពីនេះការនាំចេញកង់ ក៏ជួបនឹងការប្រកួតប្រជែងពីផលិតផលរបស់ប្រទេសផ្សេងៗផងដែរ។អនុប្រធានសភាពាណិជ្ជកម្មកម្ពុជា អ្នកឧកញ៉ាលឹម ហេង បានប្រាប់ថា កង់ផលិតនៅកម្ពុជា គឺសុទ្ធតែមានគុណភាព និងម៉ាកល្បីៗ ដោយភាគច្រើន ត្រូវបាននាំទៅប្រទេសមានសេដ្ឋកិច្ច រីកចម្រើនដូចជា អាមេរិក, កាណាដា អង់គ្លេស អឺរ៉ុប ជាដើម។
លោកបន្តថា “ទោះបីការនាំចេញកង់ នារយៈពេលចុងក្រោយនេះធ្លាក់ចុះ ប៉ុន្តែវានឹងកើនឡើងវិញនៅពេលខាងមុខ”។លោកបន្ថែមថា “ការយកចិត្តលើសុខភាព និងបរិស្ថាននឹងធ្វើឱ្យតម្រូវការកង់បន្តកើនឡើងខ្ពស់ថែមទៀត”៕
