ធនាគារអន្តរជាតិ Deutsche Bank បន្ទាបការព្យាករកំណើនសេដ្ឋកិច្ចចិន សម្រាប់ឆ្នាំ២០២៣ មកនៅត្រឹម៥,៣ភាគរយ

តែម សុខុម

សិង្ហបុរី: ធនាគារវិនិយោគពហុជាតិសាសន៍អាល្លឺម៉ង់ Deutsche Bank បានបន្ទាបការព្យាកររបស់ខ្លួនសម្រាប់កំណើនសេដ្ឋកិច្ចរបស់ប្រទេសចិន ក្នុងឆ្នាំនេះពី៦%មកត្រឹម៥,៣% ដោយលើកឡើងពីការធ្លាក់ចុះតម្រូវការប្រើប្រាស់ក្នុងស្រុក និងស្ថានភាពកាន់តែអាក្រក់ទៅនៅក្នុងវិស័យអចលនទ្រព្យចិន។

ទិន្នន័យកាលពីថ្ងៃច័ន្ទ ទី១៧ ខែកក្កដា បានបង្ហាញថា សេដ្ឋកិច្ចរបស់ប្រទេសចិន សម្រេចបានកំណើន៦,៣%ក្នុងត្រីមាសទី២ បើធៀបនឹង៤,៥%ក្នុងត្រីមាសទី១។ ទោះជាយ៉ាងណា កំណើននេះនៅទាបជាងការរំពឹងទុកក្នុងរង្វង់៧,៣% ខណៈតម្រូវការធ្លាក់ចុះទាំងនៅក្នុងស្រុក និងនៅក្រៅប្រទេស។

ធនាគារ Deutsche Bank និយាយថា ពេលនេះខ្លួនរំពឹងថានឹងមានការបន្ធូរបន្ថយរូបិយវត្ថុបន្ថែមនៅក្នុងឆមាសទី២ ចុងឆ្នាំ២០២៣ ហើយក៏មើលឃើញពីភាពចាំបាច់សម្រាប់ការបន្ធូរបន្ថយសារពើពន្ធផងដែរ។

កាលពីថ្ងៃច័ន្ទ ទី១៧ ខែកក្កដា ធនាគារអាមេរិក ធំៗចំនួន៣រួមមានធនាគារ J.P.Morgan ធនាគារ Morgan Stanley និងធនាគារ Citigroup សុទ្ធតែបានបន្ទាបការព្យាករកំណើនផលទុនជាតិសរុប (GDP) របស់ខ្លួនសម្រាប់ប្រទេសចិន។

ធនាគារ J.P.Morgan ធនាគារ Morgan Stanley និងធនាគារ Citigroup ពេលនេះសុទ្ធតែរំពឹងថា ប្រទេសចិន នឹងសម្រេចបានកំណើនសេដ្ឋកិច្ចក្នុងរង្វង់៥%នៅឆ្នាំនេះ។ ទោះជាយ៉ាងណា ធនាគារអាមេរិក មួយទៀត Goldman Sachs បានរក្សាការព្យាកររបស់ខ្លួនក្នុងរង្វង់៥,៤%ដដែល៕ Reuters៕