ដោយៈ គង់ ម៉ាលីនណា
ភ្នំពេញៈ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា (CDC) នៅឆមាសទី១ ឆ្នាំ២០២៣ បានអនុម័តគម្រោងវិនិយោគចំនួន២៧ ស្ថិតនៅក្នុងតំបន់សេដ្ឋកិច្ចពិសេស ជាមួយទុនវិនិយោគសរុបជាង៣០០លានដុល្លារ ដោយបង្កើតការងាររហូតជាង២ម៉ឺនកន្លែង។
យោងតាមរបាយការណ៍CDC ដែលបានបង្ហាញកាលពីដើមសប្តាហ៍កន្លងមកបង្ហាញថា CDC បានអនុម័តគម្រោងវិនិយោគថ្មី និងគម្រោងពង្រីកផលិតកម្មសរុប១១៣គម្រោង ទាំងគម្រោងខាងក្រៅ និងក្នុងតំបន់សេដ្ឋកិច្ចពិសេស ដែលមានទំហំវិនិយោគសរុបជាង ១ ពាន់លានដុល្លារ។
លោកលឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងថា ភាគច្រើននៃគម្រោងវិនិយោគ នៅក្នុងតំបន់សេដ្ឋកិច្ចពិសេស គឺជាគម្រោងវិនិយោគក្នុងវិស័យកាត់ដេរ ហើយគម្រោងវិនិយោគក្រៅតំបន់សេដ្ឋកិច្ចពិសេស ភាគច្រើនជាគម្រោងវិនិយោគ ក្នុងវិស័យឧស្សាហកម្មកែច្នៃ។
លោកនិយាយថា “រាល់គម្រោងវិនិយោគនៅកម្ពុជា សុទ្ធតែមានសារៈសំខាន់សម្រាប់សេដ្ឋកិច្ច និងសង្គម។ គ្រប់គម្រោងវិនិយោគសុទ្ធតែទទួលបានការលើកទឹកចិត្ត”៕
