ដោយៈ ហ្វីអូណា
ភ្នំពេញៈ ពាណិជ្ជកម្មទ្វេភាគីកម្ពុជា និងចក្រភពអង់គ្លេសសម្រេចបានទឹកប្រាក់ជិត៣១៥លានដុល្លារ ធ្លាក់ចុះជាង១២ភាគរយ បើធៀបនឹងរយៈពេលដូចគ្នាឆ្នាំ ២០២២។ការនាំចេញរបស់កម្ពុជា បានធ្លាក់ចុះរហូតជាង១៦ភាគរយ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យរបស់អគ្គនាយកដ្ឋានគយបានបង្ហាញថា ពីខែមករា-ខែឧសភា ឆ្នាំ២០២៣ ការនាំចេញ-ចូលទំនិញរវាងប្រទេសទាំង២មានទឹកប្រាក់សរុប ៣១៤,៩១លានដុល្លារ ថយចុះ១២,៦ភាគរយ បើធៀបរយៈពេលដូចគ្នាឆ្នាំ ២០២២ ដែលមានចំនួន៣៦០,៣៨ លានដុល្លារ។
ចក្រភពអង់គ្លេស គឺជាដៃគូពាណិជ្ជកម្មធំទី១១ របស់កម្ពុជា ដែលនាំមុខដោយប្រទេសចិន អាមេរិក វៀតណាម និងថៃ ជាដើម។ ក្នុងចំនួនទឹកប្រាក់ខាងលើ គឺទំនិញកម្ពុជានាំទៅចក្រភពអង់គ្លេស ២៧៥,០៣ លានដុល្លារ ថយចុះ ១៦,៦ ភាគរយ ចំណែកអង់គ្លេសនាំមកកម្ពុជា ៣៩,៨៨ លានដុល្លារកើនឡើង ៣០,១ ភាគរយ។ បើផ្អែកតាមតារាងតុល្យភាព គឺជញ្ជីងពាណិជ្ជកម្មកម្ពុជា មានឧត្តមភាព ២៣៥,១៥លានដុល្លារ។
អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា លោក ហុង វណ្ណៈ បានមានប្រសាសន៍ថា មូលហេតុដែលទំហំពាណិជ្ជកម្មកម្ពុជា-អង់គ្លេស ពិសេសការនាំចេញរបស់កម្ពុជាធ្លាក់ចុះ គឺដោយសារកំណើនសេដ្ឋកិច្ចពិភពលោកមិនល្អ។
លោកបន្តថា “សញ្ញានេះបានលេចឡើង តាំងពីដើមឆមាសទី២ ឆ្នាំ ២០២២មកម្ល៉េះ ពោលបន្ទាប់ពីសង្គ្រាមរវាងប្រទេសរុស្ស៊ី និងអ៊ុយក្រែន ផ្ទុះឡើង”។លោកបន្តថា “ក្នុងដំណាក់កាលនេះ ពាណិជ្ជកម្មអន្តរជាតិបានធ្លាក់ចុះនៅស្ទើរគ្រប់គោលដៅ”៕
