ដោយ: គង់ លាងហួរ
អន្តរជាតិ: លោក Vo Hong Thang អគ្គនាយករងនៃក្រុមហ៊ុនស្រាវជ្រាវអចលនទ្រព្យ DKRA Group បានលើកឡើងថា ប្រាក់ចំណូលប្រចាំខែចំនួន១.០០០ដុល្លារ នឹងគ្រប់គ្រាន់ក្នុងការបង់រំលោះសម្រាប់អាផាតម៉ិនទំហំ៥០ម៉ែត្រការ៉េ ដែលមានបន្ទប់គេងមួយស្ថិតនៅចម្ងាយប្រហែល១៥គីឡូម៉ែត្រ ពីតំបន់កណ្តាលទីក្រុងហូជីម៉ិញ។
ក្រុមហ៊ុនDKRA Group ដែលបាននិងកំពុងប្រមូលទិន្នន័យពីអតិថិជនបង់រំលស់ ក្នុងទីក្រុងហូជីម៉ិញ ក្នុងរយៈពេល៥ឆ្នាំចុងក្រោយនេះបានឱ្យដឹងថា បុគ្គលត្រូវមានប្រាក់ចំណូលចន្លោះពី ៣៥ ទៅ៤០លានដុង ទើបអាចទិញអាផាតម៉ិន ដែលមានទំហំ៦០ទៅ៧០ម៉ែត្រការ៉េបាន។
លោក Vo Hong Thang បានបន្តថា “សម្រាប់បុគ្គល ដែលមានប្រាក់ចំណូលតិចជាង២៥លានដុងក្នុងមួយខែ ការទិញផ្ទះអាចជាបន្ទុកមួយ ដោយសារតែបំណុលដ៏ធំ ហើយលោកណែនាំប្រជាជនក្មេងៗ ឱ្យខ្ចីប្រាក់មិនលើសពី៤០%នៃតម្លៃអចលនទ្រព្យមួយនោះទេ”។
លោកបានចង្អុលបង្ហាញថា មានប្រជាជនជាច្រើន បានធ្វើចំណាកស្រុកពីបណ្តាខេត្តផ្សេងៗ មកកាន់ទីក្រុងហូជីម៉ិញ ដើម្បីប្រកបរបរចិញ្ចឹមជីវិត ហើយពួកគេមានតម្រូវការក្នុងការទិញផ្ទះ។ ដូច្នេះទីក្រុង គួរតែមានគោលនយោបាយកម្ចី ជាប់លាប់រយៈពេល៥ឆ្នាំ ឬ១០ឆ្នាំ ដើម្បីជួយដល់អ្នកទិញផ្ទះលើកដំបូង។
ចំណែកលោក Phan Cong Chanh នាយកប្រតិបត្តិនៃក្រុមហ៊ុនអភិវឌ្ឍន៍អចលនទ្រព្យ Phu Vinh បានមានប្រសាសន៍ថា អត្រាការប្រាក់ លើប្រាក់កម្ចីបច្ចុប្បន្នប្រហែល១៣% គឺខ្ពស់ពេកសម្រាប់មនុស្សភាគច្រើនដែលចង់ទិញផ្ទះ។
លោកបានមានប្រសាសន៍ថា ក្នុងរយៈពេល៣ឆ្នាំចុងក្រោយនេះ មនុស្សជាច្រើនបានមើលឃើញថា ប្រាក់ចំណូលរបស់ពួកគេធ្លាក់ចុះ ដោយសារតែជំងឺកូវីដ១៩ និងបញ្ហាប្រឈមមុខខាងផ្នែកសេដ្ឋកិច្ច ហើយចំពោះមនុស្សជាច្រើន ដែលចង់ទិញផ្ទះឥឡូវនេះ បានត្រឹមក្លាយជាក្តីសុបិនដែលមិនអាចសម្រេចបាន។
លោកបានបញ្ជាក់ទៀតថា អាផាតម៉ិនដែលមានតម្លៃសមរម្យប្រហែល៣០លានដុងក្នុងមួយម៉ែត្រការ៉េ កំពុងបាត់ខ្លួនពីទីផ្សារក្នុងក្រុងហូជីមិញ ហើយអ្នកទិញផ្ទះលើកដំបូង ត្រូវក្រឡេកទៅមើលអាផាតម៉ិន ដែលមានតម្លៃ៤០លានដុង និងខ្ពស់ជាងនេះ៕
