ដោយៈ សុខុម
ប៉េកាំង: ប្រទេសចិន កាលពីថ្ងៃពុធ ទី២១ ខែមិថុនា បានបង្ហាញកញ្ចប់អនុគ្រោះពន្ធ ក្នុងទំហំទឹកប្រាក់៧២,៣ពាន់លានដុល្លារអាមេរិក ដើម្បីជំរុញការលក់រថយន្តអគ្គិសនី (EV) និងរថយន្តបៃតងផ្សេងៗទៀតក្នុងរយៈពេល៤ឆ្នាំខាងមុខ ដោយបានធ្វើឱ្យភាគហ៊ុននៃបណ្ដាក្រុមហ៊ុនផលិតរថយន្តហក់ឡើងយ៉ាងខ្លាំង។
ការបង្ហាញកញ្ចប់អនុគ្រោះពន្ធនេះធ្វើឡើង ស្របពេលការលក់ធ្លាក់ចុះនៅក្នុងប្រទេសចិន ដែលជាទីផ្សាររថយន្តដ៏ធំបំផុតរបស់ពិភពលោក បានបង្កឱ្យមានការព្រួយបារម្ភ អំពីកំណើនសេដ្ឋកិច្ចដែលកំពុងបាត់បង់សន្ទុះ បន្ទាប់ពីងើបឡើងយ៉ាងឆាប់រហ័ស កាលពីដើមឆ្នាំនេះ។
ក្រសួងហិរញ្ញវត្ថុចិន បានចញសេចក្តីថ្លែងការណ៍ថា រថយន្តថាមពលថ្មី (NEV) ដែលទិញក្នុងឆ្នាំ២០២៤ និង២០២៥ នឹងត្រូវបានលើកលែងពន្ធលើការទិញ ដែលមានចំនួនរហូតដល់៤.១៨០ដុល្លារអាមេរិក ក្នុងរថយន្តមួយគ្រឿងនាពេលបច្ចុប្បន្ន ជាមួយនឹងការលើកលែងពន្ធពាក់កណ្តាល សម្រាប់ការទិញក្នុងឆ្នាំ២០២៦ និងឆ្នាំ២០២៧។
អនុរដ្ឋមន្ត្រីក្រសួងហិរញ្ញវត្ថុចិន លោក Xu Hongcai បានថ្លែងក្នុងសន្និសីទសារព័ត៌មានមួយថា កញ្ចប់អនុគ្រោះពន្ធនេះ នឹងមានចំនួនសរុប៧២,៣ពាន់លានដុល្លារអាមេរិក។
ចំណាត់ការនេះ គឺជាពន្យារគោលនយោបាយបច្ចុប្បន្ន ដែលរថយន្តថាមពលថ្មី (NEV) រួមបញ្ចូលទាំងរថយន្តអគ្គិសនីសុទ្ធ (EV) រថយន្តហាយប៊្រីដ (ស៊ីសាំងលាយអគ្គិសនី) និងរថយន្តប្រើថាមពលអ៊ីដ្រូសែន ត្រូវបានបានលើកលែងពីពន្ធទិញ រហូតដល់ដំណាច់ឆ្នាំ២០២៣៕ Reuters៕