សិង្ហបុរី គ្រោងបង្កើតតំបន់ពាណិជ្ជកម្មថ្មីដែលមានផ្ទះឯកជនរាប់ពាន់យូនីត អមដោយអគារការិយាល័យ និងកន្លែងលក់រាយ

ដោយៈ សុខុម

សិង្ហបុរី: ដីនៅជិតផ្លូវបំបែកត្រង់ចំណុចស្ថានីយរថភ្លើង Jurong East MRT ត្រូវបានដាក់ដេញថ្លៃ កាលពីថ្ងៃព្រហស្បតិ៍ ទី២២ ខែមិថុនា ដើម្បីចាប់ផ្ដើមការអភិវឌ្ឍតំបន់ពាណិជ្ជកម្មថ្មីមួយ ក្នុងសង្កាត់ Jurong Lake ប្រទេសសិង្ហបុរី។

ដីទំហំ៦,៥ហិកតានេះ ដែលបំបែកជា៣ក្បាលឡូត៍នេះ នឹងត្រូវលក់ទៅឱ្យក្រុមហ៊ុនអភិវឌ្ឍន៍មួយ ដើម្បីបង្កើតតំបន់ពាណិជ្ជកម្មដែលមានលំនៅឋានឯកជនយ៉ាងច្រើន អគារការិយាល័យ និងកន្លែងលក់រាយផ្សេងៗទៀត។

អាជ្ញាធរអភិវឌ្ឍន៍ទីក្រុង (URA) និយាយថា គម្រោងថ្មីនេះនឹងភ្ជាប់ជាមួយមជ្ឈមណ្ឌលពាណិជ្ជកម្ម ដែលមានស្រាប់ជិតផ្លូវបំបែកត្រង់ចំណុចស្ថានីយរថភ្លើង Jurong East MRT និងគម្រោងស្ថានីយរថភ្លើងនាថ្ងៃអនាគត Cross Island Line ក្នុងសង្កាត់ Jurong Lake។

ការដេញថ្លៃជាសាធារណៈនេះ ផ្ដល់សញ្ញាពីការចាប់ផ្ដើមដំណា​ក់កាលបន្ទាប់ នៃការអភិវឌ្ឍសម្រាប់សង្កាត់ Jurong Lake ដែលកំពុងត្រូវបានអភិវឌ្ឍន៍ជាលំដាប់ ឱ្យក្លាយទៅជាសង្កាត់ពាណិជ្ជកម្មដ៏ធំបំផុត ដែលស្ថិតនៅក្រៅកណ្តាល ទីក្រុងនៃប្រទេសសិង្ហបុរី ដែលជាផ្នែកមួយនៃយុទ្ធសាស្ត្រវិមជ្ឈការរបស់ អាជ្ញាធរអភិវឌ្ឍន៍ទីក្រុង (URA)។

សម្រាប់ផ្ទៃដី៦,៥ហិកតាដំបូងខាងលើនេះ គឺសម្រាប់ការសាងសង់លំនៅឋានឯកជន យ៉ាងតិចប្រមាណ១.៧០០យូនីត អគារការិយាល័យ ដែលមានផ្ទៃ១៤៦.០០០ម៉ែត្រការ៉េ និងផ្ទៃក្រឡា៧៣.០០០ម៉ែត្រការ៉េសម្រាប់ហាង ភោជនីយដ្ឋាន កន្លែងកម្សាន្ត សណ្ឋាគារ និងទីធ្លាសម្រាប់សហគមន៍ប្រើប្រាស់៕ CNA៕