ដោយៈ ហ្វីអូណា
ភ្នំពេញៈ កម្ពុជារកប្រាក់បានជិត១១៤ លានដុល្លារ ពីការនាំចេញទំនិញទៅប្រទេសកូរ៉េនារយៈពេល៥ខែ ដើមឆ្នាំ២០២៣ កើនឡើងជិត១/៤ដង ធៀបនឹងរយៈពេលដូចគ្នាឆ្នាំមុន ខណៈពាណិជ្ជកម្មទ្វេភាគីសម្រេចបានជាង៣០០លានដុល្លារ។ នេះបើយោងតាម អគ្គនាយកដ្ឋានគយ និងរដ្ឋាករកម្ពុជា។
ទិន្នន័យឱ្យដឹងថា ពីខែមករា-ខែឧសភា ឆ្នាំ២០២៣ កម្ពុជាបាននាំចេញទំនិញទៅប្រទេសកូរ៉េ ក្នុងទឹកប្រាក់១១៣,៧៨ លានដុល្លារ កើនឡើង២២,៧ ភាគរយ ពីចំនួន៩២,៧២លានដុល្លារ កាលពីរយៈពេលដូចគ្នាឆ្នាំ២០២២។ ចំណែកទំនិញកូរ៉េនាំមកកម្ពុជា មានចំនួន ១៨៩,៨២ លានដុល្លារ ធ្លាក់ចុះ២៩,៥ភាគរយ ពីចំនួន ២៦៩,១១ លានដុល្លារ។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ថា កំណើនទឹកប្រាក់នាំទំនិញពីកម្ពុជា ទៅកាន់ប្រទេសកូរ៉េ បានបញ្ជាក់ថាផលិតផលកម្ពុជា គឺកំពុងឆ្លើយតបទៅនឹងតម្រូវការទីផ្សារប្រទេសកូរ៉េ ហើយកំណើននេះ នឹងអាចមានសម្ទុះកាន់តែខ្លាំង នៅពេលសេដ្ឋកិច្ចពិភពលោក ងើបចេញផុតពីវិបត្តិនាពេលបច្ចុប្បន្ន។
លោកបន្តថា “កំណើនទឹកប្រាក់នាំចេញនេះ ក៏បានមកពីកិច្ចសហប្រតិបត្តិការល្អ រវាងថ្នាក់ដឹកនាំនៃប្រទេសទាំង២ និងការចូលជាធរមាននៃកិច្ច ព្រមព្រៀងពាណិជ្ជកម្មសេរីទ្វេភាគី រវាងកម្ពុជា-កូរ៉េ និងកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយ តំបន់ (RCEP) ដែលប្រទេសទាំង២ ជាសមាជិកផងដែរ”៕
