ដោយ: គង់ លាងហួរ
ញូវដែលីៈ លោក Fatih Birol ប្រធានទីភ្នាក់ងារថាមពលអន្តរជាតិ (IEA) បានមានប្រសាសន៍ថា ឥណ្ឌានឹងវ៉ាដាច់ប្រទេសចិន ក្នុងពេលឆាប់ៗនេះ ក្នុងនាមជាអ្នកជំរុញដ៏ធំបំផុត នៃតម្រូវការប្រេងរបស់ពិភពលោក។
លោក Birol បានប្រាប់អ្នកយកព័ត៌មាន នៅខាងក្រៅព្រឹត្តិការណ៍G20 នៅទីក្រុងញូវដេលីថា “មូលហេតុមួយក្នុងចំណោមហេតុផលនានា ដែលយើងនិយាយនេះគឺថា រថយន្ត និងឡានក្រុងអគ្គិសនីនៅក្នុងប្រទេសចិន កំពុងរីកចម្រើនយ៉ាងឆាប់រហ័ស” ។
យោងតាមការចុះផ្សាយដោយសារពត៌មាន Reuter បានឱ្យដឹងថា លោក Fatih Birol មានក្តីសង្ឃឹមយ៉ាងខ្លាំងក្លាថា ប្រទេសឥណ្ឌានឹងខិតកាន់តែជិតទៅខាងដំណើរការ នៃការសាកជាមួយអគ្គិសនី។
ទីភ្នាក់ងារថាមពលដែលមានមូលដ្ឋាន នៅទីក្រុងប៉ារីសនេះបានឱ្យដឹងនៅក្នុងរបាយការណ៍ ទស្សនវិស័យរបស់ខ្លួនដែលបានចេញផ្សាយកាលពីថ្ងៃពុធថា ប្រហែលរយៈពេលចំនួន៣ត្រីមាស នៃកំណើនតម្រូវការឆ្នាំ២០២២-២០២៨ នឹងមកពីតំបន់អាស៊ី ដោយឥណ្ឌានឹងវ៉ាដាច់ប្រទេសចិន ក្នុងនាមជាប្រភពដ៏ធំបំផុត នៃកំណើនតម្រូវការប្រេងនៅឆ្នាំ២០២៧។
លោក Birol ក៏បានលើកឡើងផងដែរថា ចាប់តាំងពីប្រទេសឥណ្ឌា មានសមត្ថភាពថាមពលកកើតឡើងវិញដ៏សម្បូរបែប ប្រទេសនេះ មិនគួរខកខានឱកាស ដើម្បីក្លាយជាមហាអំណាច នៅក្នុងអាជីវកម្មអ៊ីដ្រូសែនបៃតងនោះទេ៕
