ក្រុមហ៊ុនដ៏ធំរបស់អាមេរិកគ្រោងពង្រីកផលិតកម្មនៅកម្ពុជា

ដោយៈ ម៉ាលីនណា

        ភ្នំពេញៈ ក្រុមហ៊ុន RMA (Cambodia) Plc ដែលជា​អ្នក​ចែកចាយ​ផ្តាច់មុខ​នៃ​រថ​យន្តFord បានបង្ហាញពី​ផែនការ​នឹងធ្វើ​ការពង្រីក​ការដំឡើង​ប្រភេទ​រថយន្ត​ម៉ូ​ដែល​Ford របស់ខ្លួន​មួយចំនួនទៀត ដើម្បី​ឆ្លើយតប​ ទៅនឹង​តម្រូវការ​ទីផ្សារ​នៅ​កម្ពុជា​។

រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយកអគ្គិសនីក​ម្ពុជជា លោក កែវ រតនៈបានមានប្រសាសន៍ឲ្យដឹងកាលពីចុងសប្តាហ៍មុនថា ដោយ​មើលឃើញ​ពី​ឱកាស​ នៃ​ការពង្រីក​អាជីវកម្ម​របស់ខ្លួន​នៅ​កម្ពុជា ក្រុមហ៊ុន​ផលិត​រថយន្ត Ford របស់​សហរដ្ឋអាមេរិក​មាន​ផែនការ​បោះទុន​បន្ថែម ​ក្នុងការ​ពង្រីក​ការដំឡើង​ម៉ូ​ដែល​ថ្មីៗ​ទៀត​។

លោក​បាន​ថ្លែងថា​ “​ថ្មីៗ​នេះ​ក្នុងជំនួប​ជាមួយ​ម្ចាស់​ក្រុមហ៊ុន គឺ​ក្រុមហ៊ុន​ផលិត​រថយន្តFordរបស់​អាមេរិក គ្រោង​នឹង​បន្ថែម​ទុនវិនិយោគ​ក្នុងការ​បង្គុំ និង​ដំឡើង រថយន្ត Ford ម៉ូ​ដែល Territory បន្ថែមទៀត ខណៈដែល​ម៉ូ​ដែល Ranger និង Everest កំពុង​ដំណើរ​ខ្សែចង្វាក់ ដើម្បី​បំពេញតម្រូវការ​របស់​អតិថិជន​”។​

ក្រុមហ៊ុន RMA បាន​ដាក់ឱ្យ​ដំណើរការ​ជា​ផ្លូវការ ​នៃ​រោងចក្រ​ដំឡើងរថយន្ត​ថ្មី​ម៉ាក FORD ដែលមាន​ទឹកប្រាក់​វិនិយោគ​ចំនួន​ ២១ លាន​ដុល្លារ​នៅ​ខេត្ត​ពោធិ៍សាត់​ កាលពី​ថ្ងៃ​ព្រហស្បតិ៍​ទី ​១៦ ខែឧសភា ឆ្នាំ​ ២០២២​ កន្លងមកនេះ​។​

ការប្រើប្រាស់​រថយន្ត​ថ្មី​ម៉ាក​ FORD មាន​កំណើន​កាន់តែ​ច្រើនឡើង និង​បាន​ក្លាយជា​ជម្រើស​ឈានមុខ​គេ ​របស់​អតិថិជន​នៅ​កម្ពុជា​។ ដូច្នេះ ក្រុមហ៊ុន​បានសម្រេច​ចិត្ត​ បង្កើត​រោងចក្រ​ដំឡើងរថយន្ត​ FORD ដែល​ទទួលបាន​សិទ្ធិ​ពេញលេញ​ក្នុងការ​ផ្គុំ និង​ដំឡើងរថយន្ត​ពី​ក្រុមហ៊ុន​ម្ចាស់​ដើម Ford Motor Company​។ រោងចក្រ​នេះ​នឹង​ដំឡើងរថយន្ត Ford Ranger ជំនាន់​ថ្មី និង Ford Everest​។​

​លោក​ Kevin Whitcraft ប្រធាន​ក្រុមប្រឹក្សាភិបាល បានឱ្យដឹងថា ក្នុងអំឡុង​ត្រីមាស​ទី​ ១ ឆ្នាំ​ ២០២៣ RMAC​បានផ្ដល់​ការលក់​ដ៏​រឹងមាំ ដែលមាន​ការកើនឡើង​ជាង​៤៦ភាគរយ បើ​ធៀប​នឹង​ត្រីមាស​ដូចគ្នា​កាលពី​ឆ្នាំ​ ២០២២​៕