ដោយ: គង់ លាងហួរ
អន្តរជាតិ: ក្រុមហ៊ុនអាកាសចរណ៍ China Southern Airlines កាលពីថ្ងៃពុធបានបើកសម្ពោធសេវាកម្មហោះហើរត្រង់ថ្មីមួយដែលតភ្ជាប់ទីក្រុងឡុងដ៍ និងទីក្រុងប៉េកាំង។
ផ្លូវដែលទើបបើកថ្មីនេះដំណើរការជើងហោះហើរមួយដងក្នុងមួយថ្ងៃ ដោយចេញដំណើរពីអាកាសយានដ្ឋានHeathrow នៅម៉ោង១០:៣០យប់ម៉ោងក្នុងស្រុក និងចុះចតនៅអាកាសយានដ្ឋានអន្តរជាតិក្រុងប៉េកាំង ដាស៊ីង បន្ទាប់ពីហោះហើរប្រហែល១០ម៉ោង។
នៅពេលមកដល់អាកាសយានដ្ឋាន Daxing អ្នកដំណើរអាចភ្ជាប់ជាមួយជើងហោះហើរទៅកាន់ទីក្រុងនានាក្នុងប្រទេសចិនដូចជា Guangzhou Shenzhen Xiamen Chongqing និង Changsha ក៏ដូចជាគោលដៅអន្តរជាតិដូចជាទីក្រុង Tokyo Osaka Tashkent និងទីក្រុងជាច្រើនទៀត។
អ្នកដំណើរម្នាក់ដែលមាននាមត្រកូល Niu បានលើកឡើងថា “យើងមិនដែលបានចុះចតនៅអាកាសយានដ្ឋាន Daxing ទេ ព្រោះវាទើបត្រូវបានសាងសង់កាលពីប៉ុន្មានឆ្នាំមុន ហើយយើងកំពុងទន្ទឹងរង់ចាំបទពិសោធន៍នៅទីនោះ”។
យោងតាមក្រុមហ៊ុនអាកាសចរណ៍ខាងលើបានឱ្យដឹងថា សេវាកម្មផ្លូវអាកាសថ្មីនេះដំណើរការដោយយន្តហោះ Airbus A350 ហើយត្រូវបានគេរំពឹងថានឹងដឹកជញ្ជូនអ្នកដំណើរលើសពី៦០០នាក់ក្នុងមួយថ្ងៃរវាងទីក្រុងទាំងពីរ។
លោក Chen Ke អ្នកគ្រប់គ្រងទូទៅនៃការិយាល័យក្រុមហ៊ុនអាកាសចរណ៍ China Southern Airlines នៅទីក្រុងឡុងដ៍បានមានប្រសាសន៍ថា ការដាក់ឱ្យដំណើរការផ្លូវអាកាសនេះសង្ឃឹមថា នឹងនាំមកនូវភាពរឹងមាំថ្មីដល់ការតភ្ជាប់ និងកិច្ចសហប្រតិបត្តិការរវាងចក្រភពអង់គ្លេស និងចិន ក៏ដូចជាជំរុញការផ្លាស់ប្តូររវាងប្រជាជននៃប្រទេសទាំងពីរផងដែរ៕