ដោយៈ គង់ សូរិយា
ភ្នំពេញៈ ក្រសួងពាណិជ្ជកម្ម បានធ្វើសេចក្ដីជូនដំណឹងស្ដីពីថ្នាក់បណ្ដុះបណ្ដាលពាណិជ្ជកម្ម តាមប្រព័ន្ធអេឡិចត្រូនិចដោយឥតគិតថ្លៃ។
យោងតាមសេចក្តីប្រកាសលេខ ២២៨ ព.ណ ផសព.ប្រក ចុះថ្ងៃទី៤ ខែវិច្ឆិកា ឆ្នាំ២០២២ ស្ដីពីការបង្កើតក្រុមការងារចំពោះកិច្ចសិក្សាពីលទ្ធភាព និងសម្របសម្រួលការនាំចេញ ផលិតផលខ្មែរទៅកាន់ទីផ្សារបរទេស តាមរយៈថ្នាលបច្ចេកវិទ្យាក្រុមហ៊ុន Alibaba។
ក្រោមកិច្ចសហការរវាងក្រសួងពាណិជ្ជកម្ម និងក្រុមហ៊ុន Alibaba ក្រសួងពាណិជ្ជកម្មមានកិតិ្តយស សូមជម្រាបជូនដល់សាធារណៈជនទាំងអស់់អោយបានជ្រាបថា ក្រុមហ៊ុន Alibaba នឹងបើកថ្នាក់បណ្ដុះបណ្ដាលតាមប្រព័ន្ធ អេឡិចត្រូនិចមួយឈ្មោះថា Alibaba Netpreneur Masterclass នៅ ថ្ងៃទី ២៧ ខែកក្កដា ឆ្នាំ២០២៣ ខាងមុខនេះ ក្នុងគោលបំណងផ្ដល់ដល់សហគ្រិន និងម្ចាស់អាជីវកម្មប្រព័ន្ធអេឡិចត្រូនិចទាំងអស់ នូវបទពិសោធន៍ និងជំនាញថ្មីៗ ក្នុងការប្រើប្រាស់បច្ចេកវិទ្យាឌីជីថល ដើម្បីលើកកម្ពស់អាជីវកម្ម និងសេដ្ឋកិច្ចក្នុងតំបន់ឱ្យមានភាពវិជ្ជមានប្រសើរឡើង។
តាមរយៈថ្នាក់បណ្ដុះបណ្ដាលនេះ សហគ្រិន និងម្ចាស់អាជីវកម្មនឹងទទួលបាននូវការ ទី១– យល់ដឹងកាន់តែស៊ីជម្រៅអំពីសេដ្ឋកិច្ចឌីជីថល។ ទី២– ស្វែងយល់ពីជំហានផ្សេងៗ ដើម្បីជម្រុញអាជីវកម្មអោយមានភាពយូរអង្វែងក្នុងសម័យឌីជីថល ទី៣– ទទួលបានវិញ្ញាបនបត្របញ្ជាក់ការសិក្សាក្រោយថ្នាក់បណ្ដុះបណ្ដាលចប់។
ទី៤– ទទួលបានឱកាសចូលរួមថ្នាក់បណ្ដុះបណ្ដាល ផ្ទាល់នៅទីស្នាក់ការកណ្ដាលក្រុមហ៊ុន Alibaba ប្រទេសចិន សម្រាប់បុគ្គលឆ្នើម។
កាលបរិច្ឆេទស្នើសុំដាក់ពាក្យសិក្សា គឺចាប់ពី ថ្ងៃទី ៥ ខែមិថុនា រហូតដល់ ថ្ងៃទី៣០ ខែមិថុនា ឆ្នាំ២០២៣ តាមរយៈតំណភ្ជាប់ https://agi.alibaba.com/alibabanetpreneurmasterclass2023 របស់ក្រុមហ៊ុន Alibaba។
សម្រាប់លទ្ធផលអ្នក ដែលត្រូវបានជ្រើសរើសចូលរៀន នឹងទទួលបាននៅ ថ្ងៃទី ១៧ ខែកក្កដា ឆ្នាំ២០២៣៕
