ដោយចរិយា
ភ្នំពេញៈ រាជរដ្ឋាភិបាលកម្ពុជា បានសម្រេចកំណត់ផែនការចំណូល សម្រាប់ឆ្នាំ ២០២១ខាងមុខនេះ ដោយកំណត់ចំណូលថ្នាក់ជាតិត្រឹមតែ ៤.៩០២លានដុល្លារអាមេរិក ត្រូវជា ១៦,៩០ភាគរយ នៃផលិតផលក្នុងស្រុកសរុប ថយចុះ ១៧,៣ភាគរយធៀបនឹងឆ្នាំ ២០២០ ។ នេះបើតាមសេចក្តីប្រកាសព័ត៌មាន ក្រោយសម័យប្រជុំពេញអង្គគណៈរដ្ឋម ន្ត្រីកាលពីសប្តាហ៍មុន។
តាមសេចក្តីប្រកាសដដែលនេះបានអោយដឹងថា កម្ពុជាបានកំណត់ចំណូលចរន្តថ្នាក់ជាតិ សម្រេចឱ្យបានប្រមាណ ៤.៨៤៧លានដុល្លារអាមេរិក ត្រូវជាង១៦,៧១ភាគរយនៃផលិតផលក្នុងស្រុកសរុប ថយចុះប្រមាណ១៧,៥ភាគរយធៀបនឹងឆ្នាំ២០២០ ។ ចំណូលសារពើពន្ធ ត្រូវកំណត់យកអោយបាន៤.៣០៩លានដុល្លារអាមេរិក ឬស្មើប្រមាណ១៤,៨៦ភាគរយនៃផលិតផលក្នុងស្រុកសរុប ថយចុះ១៦,៩ភាគរយធៀបនឹងឆ្នាំ ២០២០ ។
ក្នុងនោះចំណូលគយនិងរដ្ឋាករ គ្រោងចំនួន២.៣៣៩លានដុល្លារអាមេរិក ឬ៨,០៥ភាគរយ នៃផលិតផលក្នុងស្រុកសរុប ថយចុះ ១៨,៥ភាគរយធៀបនឹងឆ្នាំ២០២០ ។
ចំណែកចំណូលពន្ធដារ ដែលជាចំណូលសំខាន់មួយនោះ ក្នុងឆ្នាំ២០២១ គ្រោងរកចំណូលឲ្យបាន១.៩៧៣លានដុល្លារអាមេរិក ត្រូវជា៦,៨០ភាគរយនៃផលិតផលក្នុងស្រុកសរុប ថយចុះ១៥ភាគរយធៀបនឹងឆ្នាំ ២០២០ ។ ដោយឡែកសម្រាប់ចំណូលមិនមែនសារពើពន្ធវិញរដ្ឋាភិបាល បានគ្រោងចំនួន៥៣៨លានដុល្លារអាមេរិក។ ចំណូលទាំងនេះរដ្ឋាភិបាលមិនបានដាក់ចេញនូវប្រភេទពន្ធថ្មី ឬបង្កើនអត្រាពន្ធនោះទេ ។
ក្នុងសេចក្តីប្រកាសនេះបានបញ្ចាក់ថា ក្របខ័ណ្ឌថវិកាឆ្នាំ២០២១ មានគោលដៅបង្កើនចំណូលចរន្តថវិការដ្ឋ ឱ្យបានស្មើនឹង១៨ភាគរយ នៃផលិតផលិតក្នុងស្រុកសរុប ដែលមានការថយចុះចំនួន៥,៦៣ភាគរយ ធៀបនឹងឆ្នាំ ២០២០ ពោលគឺនឹងសម្រេចបានជាងគោលដៅនៃការប្រមូលចំណូលចរន្តថវិការដ្ឋ ដែលត្រូវបានកំណត់ឱ្យកើនជាមធ្យម ០,៣ភាគរយនៃផលិតផលក្នុងស្រុកសរុបក្នុងមួយឆ្នាំ នៅក្នុងយុទ្ធសាស្ត្រកៀងគរចំណូលឆ្នាំ ២០១៩-២០២៣ គឺដោយសារតែកត្តាសត្យានុម័ត នៃការផ្ទុះឡើងជំងឺកូវីដ១៩ និងគ្រោះមហន្តរាយនៃទឹកជំនន់ឆ្នាំ២០២០នេះ៕
