ដោយៈម៉ាណេត
ភ្នំពេញៈ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា អាជីវកម្មបង្កើតថ្មីត្រូវស្គាល់អតិថិជន ស្គាល់ទីផ្សារ និងយកបទពិសោធន៍ទាំងជោគជ័យ និងបរាជ័យសម្រាប់ជំនះ និងពង្រីកអាជីវកម្មរបស់ខ្លួន ជាពិសេសបំផុតគឺ ដើរឲ្យទាន់សម័យបច្ចេកវិទ្យា។
ការលើកឡើងបែបនេះ របស់លោកទេសរដ្ឋមន្ត្រី ចម ប្រសិទ្ធ បានធ្វើឡើងក្នុងកិច្ចប្រជុំជាមួយថ្នាក់ដឹកនាំ និងស្ថាបនិកសហគ្រាសខ្នាតតូច និងមធ្យមនិងក្រុមហ៊ុនធុរកិច្ចថ្មី ដែលប្រើប្រាស់សេវាបច្ចេកវិទ្យាឌីជីថល (Tech Startup) កាលពីថ្មីៗនេះ។
ស្ថិតក្នុងឱកាសនោះ លោកទេសរដ្ឋមន្ត្រី បានផ្តល់គំនិតមួយចំនួន សម្រាប់ជាបច្ច័យជោគជ័យក្នុងអាជីវកម្មបង្កើតថ្មី និងសហគ្រាសខ្នាតតូចនិងមធ្យម។ ក្នុងនោះលោក បានសង្កត់ធ្ងន់ថា “ជាដំបូងសម្រាប់អាជីវកម្ម គឺការគិតធំ និងចាប់ផ្តើមពីតូច” ។
លោកបានលើកឡើងថា “ជាមួយគ្នានេះត្រូវស្គាល់អតិថិជន ស្គាល់ទីផ្សារ និងយកបទពិសោធន៍ទាំងជោគជ័យ និងបរាជ័យសម្រាប់ជំនះ និងពង្រីកអាជីវកម្មរបស់ខ្លួន ជាពិសេសបំផុតគឺ ដើរឲ្យទាន់សម័យបច្ចេកវិទ្យា និងភាពបត់បែនបានរហ័សក្នុងនាមជាសហគ្រិនភាព ដែលមានការច្នៃប្រឌិតខ្ពស់” ។
មានប្រសាសន៍បិទនាឱកាសនោះ លោកទេសរដ្ឋមន្ត្រី ចម ប្រសិទ្ធ បានបង្ហាញនូវមោទនភាពដែលខ្មែរអាចធ្វើបាន តាមរយ:ការដណ្តើមបានពានរង្វាន់ជាបណ្តើរៗ និងមានការរីករាយសាទរ ឃើញសហគ្រិនខ្មែរយើងមានស្មារតីច្នៃប្រឌិត ដែលយកចំណេះជំនាញ ដែលបានរៀនសូត្រនៅឯសាលា និងការរៀនសូត្រសិក្សាស្រវជ្រាវបន្ថែម មកអនុវត្តជាក់ស្តែងក្នុងអាជីវកម្មរបស់ខ្លួន ។
លោកទេសរដ្ឋមន្ត្រី បង្ហាញនូវការជឿជាក់ចំពោះភាពជោគជ័យថ្មីៗ តទៅមុខទៀត ហើយក្រសួង ក៏បានមើលឃើញបន្ថែមទៀតនូវតម្រូវការជាក់ស្តែង និងភាពចាំបាច់នានាសម្រាប់ជួយលើកកំពស់សហគ្រាសខ្នាតតូច និងមធ្យមនិងធុរកិច្ចថ្មីនៅកម្ពុជា តាមរយ:ការបង្កើតនូវ Eco-System នានាសម្រាប់ការជួយជ្រោមជ្រែងគ្នាទៅវិញទៅមក៕