ដោយៈ គង់ សូរិយា
កំពង់ធំៈ ក្រុមហ៊ុនជប៉ុនចំនួន២ គ្រោងវិនិយោគលើម៉ាស៊ីនកែច្នៃគ្រាប់ស្វាយចន្ទីចំនួន២-៣ ដើម្បីពង្រីកការនាំចេញទៅកាន់ទីផ្សារជប៉ុន។
កាលពីសប្តាហ៍មុន ក្រោមកិច្ចសម្របសម្រួលពីមន្ត្រី នៃក្រសួងកសិកម្ម គណៈប្រតិភូជប៉ុនដឹកនាំដោយលោក Shimada Kazuichi នាយកប្រតិបត្តិនៃក្រុមហ៊ុន Mirarth Holding និងថ្នាក់ដឹកនាំនៃក្រុមហ៊ុន Top planning Japan Co., Ltd បានធ្វើដំណើរមកទស្សនកិច្ច និងជួបពិភាក្សានៅសិប្បកម្មកែច្នៃគ្រាប់ស្វាយចន្ទី ជ័យ សំបូរ។
ដំណើរទស្សនកិច្ចរបស់ក្រុមហ៊ុន គឺពិនិត្យលទ្ធភាពក្នុងការសង់អគារបន្ថែមនៅក្នុងបរិវេណ ឬជិតគ្នានឹងសិប្បកម្មកែច្នៃគ្រាប់ស្វាយចន្ទី ជ័យ សំបូរ ដើម្បីដាក់ម៉ាស៊ីនកែច្នៃគ្រាប់ស្វាយចន្ទីថ្មីចំនួន ២ ឬ៣ បន្ថែមលើម៉ាស៊ីនចំនួន២របស់ក្រុមហ៊ុន Top planning Japan Co., Ltd។
ម្ចាស់សិប្បកម្មកែច្នៃគ្រាប់ស្វាយចន្ទី ជ័យ សំបូរ ស្ថិតនៅក្នុងស្រុកកំពង់ស្វាយ ខេត្តកំពង់ធំ លោកស្រី អ៊ិន ឡៃហ៊ួតបានមានប្រសាសន៍ឲ្យដឹងថា ជាមួយនឹងម៉ាស៊ីន ដែលកំពុងមាននាពេលបច្ចុប្បន្ន គឺក្នុង១ ខែសិប្បកម្មកែច្នៃគ្រាប់ស្វាយចន្ទី ជ័យ សំបូរ អាចកែច្នៃគ្រាប់ស្វាយចន្ទីសម្រេចបានពី៦០-១០០ តោន។
លោកស្រីលើកឡើងថា ផែនការដាក់ម៉ាស៊ីនរបស់ Mirarth Holding នឹងចូលរួមចំណែកយ៉ាងច្រើន ក្នុងការបង្កើតការងារ ក៏ដូចជាជួយឱ្យប្រជាកសិករ ដាំដុះស្វាយចន្ទីទទួលបានចំណូលខ្ពស់ជាងមុន។ ក្នុងឆ្នាំ២០២៣ នេះគុណភាពគ្រាប់ស្វាយចន្ទីឆៅ គឺល្អប្រសើរជាងឆ្នាំ ២០២២ និងមានតម្លៃខ្ពស់ផងដែរ ដោយតម្លៃចន្លោះពីជាង ៣ ០០០-៤ ០០០ រៀលក្នុង១ គីឡូក្រាម កើនពីជាង១៥០០ រៀលកាលពីឆ្នាំមុន។
លោកស្រីបញ្ជាក់ថា “ខ្ញុំរំពឹងថា សមត្ថភាពកែច្នៃគ្រាប់ស្វាយចន្ទីរបស់សិប្បកម្ម ជ័យ សំបូរ នឹងអាចកើនឡើងទ្វេរដង ចាប់ពីឆ្នាំក្រោយតទៅ ខណៈMirarth Holding មានបំណងដាក់ម៉ាស៊ីន ២-៣ទៀត”។
ប្រធានសមាគមស្វាយចន្ទីកម្ពុជា (សសក) លោក អួន ស៊ីឡុត បានឱ្យដឹងថា Mirarth Holding គឺជាក្រុមហ៊ុនវិនិយោគដ៏ធំមួយមកពីប្រទេសជប៉ុន ដោយក្រុមហ៊ុនគ្រោង នឹងចាប់ដៃគូសហការជាមួយក្រុមហ៊ុន Top Planning Japan ដែលកំពុងដំណើរការស្រាប់លើការងារកែច្នៃគ្រាប់ស្វាយចន្ទី នៅសិប្បកម្មកែច្នៃគ្រាប់ស្វាយចន្ទី ជ័យ សំបូរ ដើម្បីបង្កើនសមត្ថភាពផលិត និងនាំចេញទៅទីផ្សារជប៉ុន កូរ៉េ ចិន និងអឺរ៉ុប ជាដើម។
លោកស៊ីឡុតបានបន្តថា ការសហការរវាងក្រុមហ៊ុនជប៉ុនទាំង ២ នឹងបង្កើនសមត្ថភាពនៃការប្រមូលទិញ គ្រាប់ចន្ទីស្រស់ពីកសិករក្នុងគោលបំណងកែច្នៃគ្រាប់ស្វាយចន្ទី ដែលមានគុណភាពលេខ១ សម្រាប់នាំចេញ រួមជាមួយពង្រីកការកែច្នៃទៅលើសម្បកគ្រាប់ចន្ទីជាប្រេងឥន្ធនៈ ដែលមានគុណភាពខ្ពស់ ដើម្បីបង្កើនតម្លៃបន្ថែមផងដែរ។
របាយការណ៍ពីសមាគមស្វាយចន្ទីកម្ពុជា បានបង្ហាញថា ក្នុងឆ្នាំ ២០២២ កម្ពុជានាំចេញគ្រាប់ស្វាយចន្ទីឆៅ ទៅទីផ្សារអន្តរជាតិចំនួន ៦៧ ម៉ឺនតោន គិតជាប្រាក់១៧៧លានដុល្លារ។ ក្នុងនោះប្រទេសនាំចូលគ្រាប់ស្វាយចន្ទីពីកម្ពុជា មានដូចជា វៀតណាម ជប៉ុន និងចិន ខណៈប្រទេសផ្សេងៗទៀត កំពុងសម្លឹងមើលឱកាសនាំចូលគ្រាប់ស្វាយចន្ទីពីកម្ពុជា៕