ដោយៈ និស្ស័យ
ភ្នំពេញៈ កម្ពុជាបាននាំចេញស្រូវ -អង្ករ ទៅទីផ្សារអន្តរជាតិក្នុងបរិមាណសរុបជិត៣,៦ លានតោននៅក្នុងឆមាសទី១ ឆ្នាំ២០២៥ ដោយប្រមូលបានប្រាក់ជាង១ពាន់លានដុល្លារ កើនឡើងជិត៧ភាគរយបើធៀបនឹងឆមាសទី១ ឆ្នាំមុន។
នៅកម្ពុជាបច្ចុប្បន្ននេះ មានក្រុមហ៊ុនចំនួន៥០កំពុងធ្វើប្រតិបត្តិការនាំចេញអង្ករទៅទីផ្សារអន្តរជាតិ។
យោងតាមទិន្នន័យសហព័ន្ធស្រូវអង្ករកម្ពុជា(CRF) បានបង្ហាញថា ចាប់ពីខែមករា ដល់ខែមិថុនា ឆ្នាំ២០២៥ កម្ពុជាបាននាំចេញអង្ករចំនួន ៣៨៧,០៧០តោនទៅកាន់ប្រទេស/ដែនដី៦៣ ដោយប្រមូលបានប្រាក់២៨៣,៤១លានដុល្លារ។ កាលពីឆមាសទី១ ឆ្នាំ២០២៤ កម្ពុជានាំចេញអង្ករចំនួន៣៣៨,៦៥៤ តោន គិតជាប្រាក់២៤៧,៦លានដុល្លារ។
ស្ថាប័នខាងលើបានឲ្យដឹងថា គោលដៅនាំចេញអង្ករសំខាន់ៗក្នុងឆមាសទី១ ឆ្នាំ២០២៥ រួមមាន បណ្តាប្រទេសក្នុងតំបន់អឺរ៉ុប(២៦ ប្រទេស) មានបរិមាណ១៨២,៨៨៥តោន គិតជាប្រាក់១៤៣,៦៤ លានដុល្លារ ប្រទេសចិន និងតំបន់រដ្ឋបាលស្វយ័ត១០២, ៥០៩តោន គិតជាប្រាក់៦០,២៥លានដុល្លារ, ប្រទេសសមាជិកអាស៊ាន (៧ ប្រទេស)៥២,៨៩០តោន គិតជាប្រាក់៣៧,០៩លានដុល្លារ និងគោលដៅផ្សេងៗទៀត(៣២ ប្រទេស)៤៨,៧៨៥ តោន គិតជាប្រាក់ ៤២,៤២លានដុល្លារ។
ដោចំណែកការនាំចេញស្រូវ ក្នុងឆមាសទី១ ឆ្នាំ២០២៥ សម្រេចបាន៣,១៧៦,៥៦១តោន គិតជាប្រាក់៧៥៧,៤៩ លានដុល្លារបើធៀបនឹងឆមាសទី១ ឆ្នាំ២០២៤ ដែលមានបរិមាណ២,៥២៨, ០១១តោន និងទទួលបានប្រាក់៧២៧,៣៦លានដុល្លារ។ នេះបើតាម CRF។
រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល ក្នុងខួប ១០ឆ្នាំនៃការបង្កើតសហព័ន្ធស្រូវអង្ករកម្ពុជា(CRF) កាលពីថ្ងៃទី១៦ ខែមិថុនា បានលើកឡើងថា ជាមួយនឹងកិច្ចខិតខំរួមគ្នា រវាងសហព័ន្ធស្រូវអង្ករកម្ពុជា ដៃគូអភិវឌ្ឍន៍ និងភាគីពាក់ព័ន្ធ បច្ចុប្បន្នកម្ពុជាបានប្រែក្លាយខ្លួន ទៅជាប្រទេសមានអតិរេកស្រូវអង្ករយ៉ាងច្រើន។ ជាក់ស្តែងនៅដើមនីតិកាលទី៧ នៃរដ្ឋសភានេះ ក្រសួងពាណិជ្ជកម្មបានជំរុញឱ្យមានការរៀបចំ និងបានចុះអនុស្សរណៈយោគយល់គ្នា នាំចេញអង្ករទៅប្រទេសចិនចំនួន៥០ម៉ឺនតោន ការបើកច្រកទីផ្សារនាំចេញទៅប្រទេសឥណ្ឌូនេស៊ី តាមរយៈក្រុមហ៊ុនហ្គ្រីនត្រេដ ចំនួន៣៧,៥០០តោន និងប្រទេសទីម័រលេស្តេរ៤០០០តោន។
កាលឆ្នាំ២០២៤ កម្ពុជាបាននាំចេញអង្ករជាង៦៥ម៉ឺនតោន ទៅកាន់ប្រទេសចំនួន៧៥។
លោកស្រីបានថ្លែងថា “ស្រូវ គឺជាដំណាំយុទ្ធសាស្ត្ររបស់កម្ពុជាសម្រាប់សន្តិសុខស្បៀង និងអាហារូបត្ថម្ភ ដោយមិនត្រឹមតែជាអាហារមូលដ្ឋានដ៏ចាំបាច់ប៉ុណ្ណោះទេ ប៉ុន្តែថែមទាំងជាទំនិញនាំចេញដ៏មានសក្ដានុពល ក្នុងចំណោមបញ្ជីផលិតផលកសិកម្ម ដែលបានជ្រើសរើសជាអាទិភាពសម្រាប់ជំរុញការនាំចេញទៀតផង”។ លោកស្រីបន្តថា “តាមរយៈក្រុមហ៊ុនហ្រ្គីនត្រេដ ក្រសួងពាណិជ្ជកម្ម បាននិងកំពុងបន្តការប្រឹងប្រែងក្នុងការចរចា ជាមួយបណ្តាប្រទេសក្នុងតំបន់មួយចំនួនដើម្បីពង្រីកទីផ្សារអង្ករកម្ពុជា”។
គុណភាពអង្ករកម្ពុជា ត្រូវបានពិភពលោកទទួលស្គាល់ជាអង្ករមានគុណភាពល្អដាច់គេ ដោយធ្លាប់បានឈ្នះ “ពានរង្វាន់ជាអង្ករល្អដាច់គេលើពិភពលោក”ចំនួន៦លើករួចមកហើយ គឺក្នុងឆ្នាំ២០១២ ២០១៣, ២០១៤, ២០១៨, ២០២២, និងលើកចុងក្រោយកាលពីឆ្នាំ២០២៤៕
