ដោយ: គង់ លាងហួរ
ព្រះសីហនុ: រោងចក្រផលិតសំបកកង់ដែលបោះទុនវិនិយោគដោយក្រុមហ៊ុនចិននៅក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) បានបើកដំណើរការជាផ្លូវការហើយកាលពីថ្ងៃចន្ទម្សិលមិញនេះ។
រោងចក្រផលិតសំបកកង់ General Tire Technology (Cambodia) តម្លៃ៣០០លានដុល្លារ ដែលមានទីតាំងស្ថិតនៅក្នុងខេត្តមាត់សមុទ្រព្រះសីហនុ គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតសំបកកង់ចិន Jiangsu General Science Technology។
សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងឯកអគ្គរដ្ឋទូតចិនប្រចាំនៅកម្ពុជា លោក Wang Wentian បានអញ្ជើញកាត់ខ្សែបូសម្ពោធរោងចក្រនេះជាផ្លូវការ ដោយចូលរួមក្នុងពិធីអបអរសាទរខួប១០ឆ្នាំនៃគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន (BRI) នៅតំបន់សេដ្ឋកិច្ចពិសេស SSEZ។
សម្តេចតេជោបានមានប្រសាសន៍ថា រោងចក្រសំបកកង់គឺជាផ្លែផ្កាមួយទៀតនៃកិច្ចសហប្រតិបត្តិការរវាងកម្ពុជា និងចិនក្រោមគំនិតផ្តួចផ្តើម BRI ដោយបន្ថែមថារោងចក្រនេះនឹងដើរតួយ៉ាងសំខាន់ក្នុងការកែច្នៃកៅស៊ូក្នុងស្រុកទៅជាសំបកកង់។
សម្តេចបន្តទៀតថា “រោងចក្របាននាំមកនូវដើមទុនថ្មី បច្ចេកវិទ្យាទំនើប និងជំនាញផលិតសំបកកង់រថយន្តមកកាន់កម្ពុជា ហើយរោងចក្រនេះនឹងបង្កើនតម្លៃបន្ថែមដល់សេដ្ឋកិច្ចជាតិ និងបង្កើនប្រាក់ចំណូលរបស់កសិករយើងដោយផ្ទាល់”។
លោក Gu Cui ប្រធានក្រុមហ៊ុន Jiangsu General Science Technology បានមានប្រសាសន៍ថា រោងចក្រនេះមានសមត្ថភាពផលិតសំបកកង់ពាក់កណ្តាលដែកចំនួន៥លានកង់ និងសំបកកង់រ៉ាឌីកាល់ដែកទាំងអស់៩០០.០០០ក្នុងមួយឆ្នាំ។
លោក Gu Cui បានមានប្រសាសន៍បន្ថែមទៀតថា “ផលិតផលរបស់យើងនឹងត្រូវបាននាំចេញជាចម្បងទៅកាន់សហរដ្ឋអាមេរិក អឺរ៉ុប និងប្រេស៊ីលក្នុងចំណោមផលិតផលផ្សេងទៀត”៕
