ដោយ: គង់ លាងហួរ
ភ្នំពេញ: អគ្គនាយកដ្ឋានពន្ធដារ (GDT) នៃក្រសួងសេដ្ឋកិច្ច និងហិរញ្ញវត្ថុ (MEF) បានដាក់ចេញនូវយុទ្ធសាស្ត្រសម្រាប់មន្ត្រីពន្ធដារគ្រប់ៗគ្នា ដើម្បីគ្រប់គ្រងការប្រមូលបំណុលពន្ធឱ្យមានប្រសិទ្ធភាពតាមផែនការសកម្មភាព និងសម្រេចបាននូវទិសដៅចំណូលពន្ធសម្រាប់ឆ្នាំ២០២៣នេះ។
អគ្គនាយកដ្ឋានពន្ធដារ (GDT) កាលពីថ្ងៃអង្គារបានចេញផ្សាយយុទ្ធសាស្រ្តនៅក្នុងសិក្ខាសាលាបណ្តុះបណ្តាលសម្រាប់មន្ត្រីពន្ធលើបទប្បញ្ញត្តិ និងនីតិវិធីនៃការគ្រប់គ្រងការប្រមូលបំណុលពន្ធ និងការប្រើប្រាស់ប្រព័ន្ធគ្រប់គ្រងបំណុលពន្ធ។ ពិធីនេះប្រព្រឹត្តទៅក្រោមអធិបតីភាពរបស់លោក កែន សម្បត្តិ អគ្គនាយករងនៃអគ្គនាយកដ្ឋានពន្ធដារ (GDT)នៅខេត្តរតនគិរី។
ថ្លែងក្នុងពិធីបើកសិក្ខាសាលា លោក កែនសម្បត្តិ បានមានប្រសាសន៍ថា “មន្ត្រីពន្ធដារចាំបាច់ត្រូវបំពាក់នូវយុទ្ធសាស្ត្រប្រមូលបំណុលពន្ធ ដោយផ្អែកលើច្បាប់ និងបទប្បញ្ញត្តិស្តីពីបំណុលពន្ធ និងប្រើប្រាស់ប្រព័ន្ធគ្រប់គ្រងបំណុលពន្ធ ដើម្បីឆ្លើយតបអ្នកជាប់ពន្ធជាមួយនឹងព័ត៌មានត្រឹមត្រូវ និងអាចទុកចិត្តបាន”។
លោកបន្តថា “មន្ត្រីពន្ធដារត្រូវយកចិត្តទុកដាក់ខ្ពស់ចំពោះការអនុវត្តប្រព័ន្ធគ្រប់គ្រងបំណុលពន្ធដែលទើបតែត្រូវបានបង្កើត និងដាក់ឱ្យដំណើរការ ហើយពួកគេត្រូវបញ្ចូលទិន្នន័យបំណុលពន្ធក្នុងប្រព័ន្ធឱ្យបានត្រឹមត្រូវ ដែលធ្វើឱ្យពួកគេអាចគ្រប់គ្រងបំណុលពន្ធកាន់តែមានប្រសិទ្ធភាព និងប្រកបដោយតម្លាភាព”។
លោក កែន សម្បត្តិ បានស្នើឱ្យមន្ត្រីពន្ធដារចាត់ថ្នាក់បំណុលពន្ធដែលមិនអាចប្រមូលបានឱ្យបានច្បាស់លាស់ ដោយបង្កើតក្រុមការងារ ដែលមានតំណាងនាយកដ្ឋានគ្រប់គ្រងអ្នកជាប់ពន្ធតូច និងមធ្យម ដើម្បីស្នើសុំដកតួលេខទាំងនេះចេញពីបញ្ជីបំណុលពន្ធ ដើម្បីចៀសវាងការហើមនៃតួលេខបំណុលពន្ធនៅក្នុងប្រព័ន្ធ ព្រមទាំងដើម្បីរៀបចំ និងអនុវត្តផែនការទាមទារបំណុលពន្ធ។
លោកបញ្ជាក់ទៀតថា “មន្ត្រីពន្ធដារត្រូវបន្តតាមដានជាប្រចាំលើការបង់បំណុលពន្ធតាមចំនួនដែលអ្នកជាប់ពន្ធយល់ព្រមបង់តាមដំណាក់កាល និងរាយការណ៍ព័ត៌មានថ្មីៗជូនថ្នាក់ដឹកនាំរបស់យើងទាក់ទងនឹងសហគ្រាសដែលមិនបានបង់បំណុលពន្ធដូចដែលបានព្រមព្រៀងគ្នាដើម្បីស្នើសុំអនុសាសន៍ និងវិធានការដែលត្រូវអនុវត្តបន្ថែមទៀត”៕
