ដោយៈ គង់ សូរិយា
ភ្នំពេញៈ ក្រុមមន្រ្តីក្រសួងសាធារណៈការ និងដឹកជញ្ជូនបានចូលរួមក្នុងសិក្ខាសាលា ផ្សព្វផ្សាយឯកសារផែនការសកម្មភាពឆ្លើយតបនឹងការប្រែប្រួលអាកាសធាតុ ក្នុងវិស័យដឹកជញ្ជូន(CCAP 2020-2023)។
សិក្ខាសាលានេះ ក៏បានចែករំលែកចំណេះដឹងផ្នែកបរិស្ថានបៃតង(Green Environmental) ក្នុងវិស័យសាធារណការ និងដឹកជញ្ជូន។
លោកស៊ឹង សុគង់ អនុរដ្ឋលេខាធិការ ក្រសួងសាធារណៈការ និងដឹកជញ្ជូន បានអញ្ជើញជាអធិបតីក្នុងពិធីបើក សិក្ខាសាលាផ្សព្វផ្សាយឯកសារផែនការសកម្មភាព ឆ្លើយតបនឹងការប្រែប្រួលអាកាសធាតុ ក្នុងវិស័យដឹកជញ្ជូន(CCAP 2020-2023) និងចែករំលែកចំនេះដឹងផ្នែកបរិស្ថាន ក្នុងវិស័យសាធារណការ និងដឹកជញ្ជូន ដោយមានការចូលរួមមក ពីអង្គភាពពាក់ព័ន្ធក្រោមឱវាទក្រសួង និងមន្ទីរសាធារណការ និងដឹកជញ្ជូនទូទាំង២៥រាជធានី-ខេត្ត សរុបសិក្ខាកាម ប្រមាណ១០០រូប។
ថ្លែងទៅកាន់អង្គពិធីនាឱកាសនោះ លោករដ្ឋលេខាធិការ បានថ្លែងអំណរគុណដល់អគ្គនាយកដ្ឋានផែនការ និងគោលនយោបាយ មន្ត្រីជំនាញការរបស់ទីភ្នាក់ងារ សហប្រតិបត្តិការអន្តរជាតិជប៉ុន(JICA) និងសិក្ខាកាមពាក់ព័ន្ធទាំងអស់ ដែលអញ្ជើញមកពីអង្គភាពក្រោមឱ្យវាទក្រសួង និងមន្ទីរសាធារណការ និងដឹកជញ្ចូនទូទាំងរាជធានី-ខេត្ត។
លោកបន្តថា “នេះជាការគូសបញ្ជាក់ពីកិច្ចខិតខំ ប្រឹងប្រែងរបស់ក្រសួងស្របពេលខិតខំ អភិវឌ្ឍហេដ្ឋារចនាសម្ព័ន្ធ ដែលជាចក្ខុវិស័យសំខាន់ៗ ហើយក៏បានធ្វើឱ្យប្រសើឡើង នូវបរិស្ថានបៃតង ជាមួយការបញ្ជ្រាបឯកសារពាក់ព័ន្ធដល់សិក្ខាកាម សម្រាប់ជាការឆ្លើយតប ទប់ស្កាត់នឹងការប្រែប្រួលអាកាសធាតុ ទាំងសកម្មភាពបន្សាំ និងការកសាងសមត្ថភាព ក្នុងស្ថាប័ន ជួយលើកកម្ពស់ការយល់ដឹង អំពីការប្រឈម លើកត្តាបរិស្ថានក្នុងវិស័យដឹកជញ្ជូន ហើយបានរួមចំណែកផ្ដល់ចំណេះដឹង និងបទពិសោធន៍ថ្មីៗថែមទៀត”៕
