ដោយ: គង់ លាងហួរ
បាងកកៈ មន្ត្រីថៃមួយរូបបាអះអាងកាលពីថ្ងៃសៅរ៍ សប្តាហ៍មុនថា ក្រុមហ៊ុនចិន Hozon New Energy Automobile គ្រោងផលិតរថយន្តអគ្គិសនីនៅក្នុងប្រទេសថៃ សម្រាប់ដាក់លក់នៅលើទីផ្សារអាសុីអាគ្នេយ៍ ខណៈក្រុមហ៊ុនផ្សេងទៀត ក៏កំពុងសាងសង់របស់ខ្លួនផងដែរ នៅក្នុងមជ្ឈមណ្ឌលផលិតរថយន្តដ៏សំខាន់ ក្នុងតំបន់មួយនេះ។
អ្នកនាំពាក្យរដ្ឋាភិបាលថៃ លោក Tipanan Sirichana បានឱ្យដឹងនៅក្នុងសេចក្តីថ្លែងការណ៍មួយថា Hozon បានចុះហត្ថលេខាលើកិច្ចព្រមព្រៀងជាមួយក្រុមហ៊ុនថៃ Bangchan General Assembly ដើម្បីចាប់ផ្តើមផលិតកម្មរថយន្តម៉ូដែល NETA V របស់ខ្លួន ដែលរំពឹងទុកនៅឆ្នាំ២០២៤។
លោក Tipanan បានបន្តថា ក្រុមហ៊ុនផលិតរថយន្តHozon បានបើកដំណើរការម៉ូដែល NETA V របស់ខ្លួននៅលើទីផ្សារប្រទេសថៃកាលពីឆ្នាំមុន ហើយគ្រោងនឹងចាប់ផ្តើម ផ្តល់ជូននូវម៉ូដែល NETA U និង NETA S របស់ខ្លួននាពេលអនាគតដ៏ខ្លីខាងមុខនេះ។
ក្រុមហ៊ុនផលិតEV របស់ចិនផ្សេងទៀតដូចជា BYD ក៏បានបោះទុនវិនិយោគ នៅក្នុងរោងចក្រថៃផងដែរ ដោយសារតម្រូវការកើនឡើង ក្នុងចំណោមអ្នកប្រើប្រាស់ក្នុងស្រុក ដែលជ្រើសរើសពីម៉ាកល្បីៗដូចជា Great Wall Motors និង Tesla ។
មន្ត្រីថៃមួយរូបបានអះអាងថា ក្រុមហ៊ុន Changan Auto របស់ប្រទេសចិន នឹងបោះទុនវិនិយោគ២៨៥លានដុល្លារ ក្នុងរោងចក្រមួយរបស់ប្រទេសថៃ។
លើសពីនេះ ប្រទេសថៃគឺជាមជ្ឈមណ្ឌលដំឡើង និងនាំចេញរថយន្តធំជាងគេទី៤ នៅតំបន់អាស៊ីសម្រាប់ ក្រុមហ៊ុនផលិតរថយន្តធំៗដូចជា Toyota និង Honda។
ប្រទេសនេះ មានគោលបំណងប្រកប ដោយមហិច្ឆិតាក្លាយជាតួអង្គដ៏សំខាន់ នៅក្នុងខ្សែសង្វាក់ផ្គត់ផ្គង់EV សកលនៅខាងក្រៅប្រទេសចិន ដោយរដ្ឋាភិបាលថៃបានផ្តល់ ជូននូវការកាត់បន្ថយពន្ធ និងការឧបត្ថម្ភធន ដើម្បីជំរុញការអនុម័ត និងផលិតកម្មរថយន្តអគ្គិសនី EV ៕
