ដោយៈ សុខុម
ហាណូយ: ក្រុមអ្នកជំនាញសេដ្ឋកិច្ច និងអ្នកបង្កើតគោលនយោបាយលើកឡើងថា តម្រូវការកើនឡើងរបស់វៀតណាម សម្រាប់ការអភិវឌ្ឍ ហេដ្ឋារចនាសម្ព័ន្ធនៅប៉ុន្មានឆ្នាំខាងមុខ ទាមទារឱ្យរដ្ឋាភិបាល ដាក់ចេញគោលនយោបាយនានា ដែលលើកទឹកចិត្តឱ្យមានការចូលរួមពីវិស័យឯកជន។
ធនាគារអភិវឌ្ឍន៍អាស៊ី (ADB) បានប៉ាន់ប្រមាណថា នៅឆ្នាំ២០៣០ តម្រូវការវិនិយោគហេដ្ឋារចនាសម្ព័ន្ធ មូលដ្ឋានរបស់វៀតណាម នឹងមានទំហំរហូតប្រមាណ៤៨០ពាន់លានដុល្លារអាមេរិក។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃច័ន្ទ ទី៨ ខែឧសភា។
គម្រោងហេដ្ឋារចនាសម្ព័ន្ធនានា ដើរតួនាទីយ៉ាងសំខាន់ក្នុងការដឹកនាំការអភិវឌ្ឍសេដ្ឋកិច្ច -សង្គមរបស់ប្រទេសនេះ ជាពិសេសក្នុងវិស័យដឹកជញ្ជូន និងវិស័យឧស្សាហកម្ម។
ដើម្បីពន្លឿនដំណើរការនេះ រដ្ឋាភិបាលវៀតណាម បានអនុវត្តក្របខ័ណ្ឌច្បាប់ និងគោលនយោបាយមួយចំនួន រួមទាំងច្បាប់ស្តីពីការវិនិយោគក្នុងទម្រង់ នៃភាពជាដៃគូសហការ រវាងវិស័យសាធារណៈ និងវិស័យឯកជន (PPP) ក្នុងឆ្នាំ២០២០ និងក្រឹត្យ ព្រមទាំងបទប្បញ្ញត្តិមួយចំនួនទៀតផងដែរ។
ចំណាត់ការបែបនេះ មានគោលបំណងផ្តល់នូវគោលការណ៍ណែនាំ និងបទប្បញ្ញត្តិគ្រប់ជ្រុងជ្រោយស្ដីពី របៀបបង្កើតគម្រោងភាពជាដៃគូសហការ រវាងវិស័យសាធារណៈ និងវិស័យឯកជន។
ទោះជាយ៉ាងណា យោងតាមក្រុមអ្នកជំនាញសេដ្ឋកិច្ចបង្ហាញថា នៅមានចំណុចខ្វះខាត និងភាពនៅមានកម្រិតជាច្រើននៅឡើយ៕ Vietnam News៕
