ដោយៈ ម៉ាលីនណា
ភ្នំពេញៈ សហគ្រាសធុនតូច និងមធ្យម (SME) ចំនួន៤ កំពុងធ្វើការជាមួយនឹងផ្សារមូលបត្រកម្ពុជា (CSX) ដើម្បីប្រមូលមូលនិធិសម្រាប់ពង្រីកអាជីវកម្មរបស់ពួកគេ តាមរយៈការបោះផ្សាយមូលបត្រនៅលើទីផ្សារមូលធន។
ទីប្រឹក្សារាជរដ្ឋាភិបាល ទទួលបន្ទុកជាអគ្គនាយកផ្សារមូលបត្រកម្ពុជា លោក ហុង សុហួរ អគ្គនាយក CSX បានមានប្រសាសន៍ឲ្យដឹងថា ក្រុមហ៊ុនទាំង៤នេះ មកពីក្រុមហ៊ុនសំណង់ និងអាជីវកម្មបច្ចេកវិទ្យា បានបង្ហាញពីចំណាប់អារម្មណ៍របស់ពួកគេ ក្នុងការចុះបញ្ជីនៅលើទីផ្សារមួយនេះ ដើម្បីស្វែងរកមូលនិធិបន្ថែម សម្រាប់ពង្រីកអាជីវកម្ម។
លោកបានថ្លែងថា “យើងកំពុងធ្វើការជាមួយពួកគេ ដើម្បីពន្យល់ពីដំណើរការមួយចំនួនលើការចុះបញ្ជី និងអ្វីដែលពួកគេគួររៀបចំ”។
ជាមួយនឹងការងារនេះ យើងបានធ្វើការ ជាមួយពួកគេនិងមានក្រុមហ៊ុន១ មកពីវិស័យសំណង់ នៅក្នុងចំណោមក្រុមហ៊ុនចំនួន ៤ នឹងរួចរាល់មុនដំណាច់ឆ្នាំនេះ ពីព្រោះពួកគេបានរៀបចំយ៉ាងល្អនូវអភិបាលកិច្ច សហប្រតិបត្តិការ និងលទ្ធកម្មផ្ទៃក្នុងសម្រាប់ការចុះបញ្ជីពួកគេនៅទីផ្សារកំណើន។លោកបន្តថា ខណៈពេលដែលក្រុមហ៊ុនចំនួន៣ ផ្សេងទៀតនឹងត្រូវការ ពេលបន្ថែមទៀតសម្រាប់ការរៀបចំ។
លោកបន្តថា “ខ្ញុំសូមលើកទឹកចិត្តដល់សហគ្រាសធុនតូច និងមធ្យមទាំងអស់ឱ្យស្វែងរកមូលនិធិ តាមរយៈការចុះបញ្ជីជាមួយផ្សារហ៊ុន ដូចដែលអ្នកបានឃើញហើយក្នុងអំឡុង ការរីករាលដាលជំងឺកូវីដ ១៩ អាជីវកម្មជាច្រើនបានប្រឈមមុខ នឹងការលំបាកផ្នែកហិរញ្ញវត្ថុ”។
លោកហុង សុហួរបានបន្តថា ការទទួលបានក្រុមហ៊ុនចុះបញ្ជីលើផ្សារហ៊ុន ដើម្បីស្វែងរកមូលនិធិ សម្រាប់ការពង្រីកអាជីវកម្ម និងនិរន្តរភាព បង្ហាញថា ទីផ្សារមូលធន បានក្លាយជាប្រភពមូលនិធិថ្មីសម្រាប់ពួកគេ៕