ដោយៈ ច្រាយ ចំណាន
ភ្នំពេញៈ រដ្ឋាភិបាលកម្ពុជារកចំណូលពន្ធ បានប្រមាណជាង២១ លានដុល្លារ ពីការធ្វើពាណិជ្ជកម្មតាមប្រព័ន្ធអេឡិចត្រូនិក (e-commerce) នៅត្រីមាសទី១ ឆ្នាំ ២០២៣។
ចំនួនទឹកប្រាក់នេះ បាននិងកំពុងឆ្លុះបញ្ចាំង ពីការកើនឡើងប្រតិបត្តិការតាមអនឡាញ ក្នុងរយៈពេលប៉ុន្មានឆ្នាំចុងក្រោយនេះ ពិសេសចាប់តាំងពីការរីករាលដាលជំងឺកូវីដ ១៩ មក។
យោងតាមរបាយការណ៍ពីអគ្គនាយកដ្ឋានពន្ធដារ (GDT) ប្រាក់ចំណូលពន្ធលើតម្លៃបន្ថែម ពីពាណិជ្ជកម្មតាមប្រព័ន្ធអេឡិចត្រូនិក នៅក្នុងត្រីមាសទី១ ឆ្នាំ ២០២៣ មានប្រមាណ២០,៩១ លានដុល្លារ ខណៈចំណូលនេះ រួមចំណែកដល់ការបង្កើត ប្រាក់ចំណូលពន្ធរបស់រដ្ឋាភិបាលពីអាជីវកម្មបច្ចេកវិទ្យា ដែលជាប្រភពចំណូលថ្មី។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ថា ការកើនឡើងនៃអាជីវកម្មបច្ចេកវិទ្យា ស្របពេលការអភិវឌ្ឍយ៉ាងឆាប់រហ័ស នៃការទូទាត់តាមរយៈឌីជីថលបានក្លាយជានិន្នាការថ្មីមួយ នៃការផ្លាស់ប្តូរសកម្មភាពសេដ្ឋកិច្ច នៅកម្ពុជាក្នុងរយៈពេលជាច្រើនឆ្នាំចុងក្រោយនេះ ជាពិសេសក្នុងអំឡុងពេលរីករាលដាលជំងឺកូវីដ ១៩។
លោកបន្តថា អាជីវកម្មជាច្រើន កំពុងទទួលយកវេទិកាឌីជីថលដើម្បីបម្រើដល់តម្រូវការរបស់អតិថិជន ដែលចូលចិត្តទិញទំនិញតាមអ៊ីនធឺណិត ខណៈមធ្យោបាយនៃការទូទាត់ តាមរយៈឌីជីថលក៏កាន់តែមានភាពងាយស្រួល និងទាន់ពេលវេលាផងដែរ។
ចំណែកលោកបណ្ឌិតគី សេរីវឌ្ឍន៍ អ្នកស្រាវជ្រាវផ្នែកសេដ្ឋកិច្ចនៃរាជបណ្ឌិត្យសភាកម្ពុជា ក៏បានចង្អុលបង្ហាញថា ទន្ទឹមនឹងនោះប្រទេសកម្ពុជា ក៏មានគោលដៅប្រែក្លាយ ទៅជាសេដ្ឋកិច្ចឌីជីថលសម្រាប់ឆ្នាំខាងមុខ។ ការរីកចម្រើនឆាប់រហ័ស នៃពាណិជ្ជកម្មតាមអេឡិចត្រូនិក គឺជាសញ្ញាវិជ្ជមានសម្រាប់ចក្ខុវិស័យខាងលើ។
លោកបញ្ជាក់ថា “យើងមើលឃើញថា ពាណិជ្ជកម្មតាមប្រព័ន្ធអេឡិចត្រូនិក មានសារៈសំខាន់កាន់តែខ្លាំង សម្រាប់ប្រជាជនយើងជារៀងរាល់ថ្ងៃ ដោយសារមនុស្សជាច្រើន ជាពិសេសនៅតាមទីក្រុង និងខេត្តធំៗ ចូលចិត្តទិញទំនិញ និងសេវាកម្មតាមអ៊ីនធឺណិត ជាជាងទៅទីផ្សារដោយផ្ទាល់។
និន្នាការនេះបង្ហាញថា យើងកំពុងឆ្ពោះយ៉ាងលឿនក្នុងការទទួលយកពិភពឌីជីថល”៕