ដោយ៖ ម៉ាណេត
ភ្នំពេញ៖ ចក្រភពអង់គ្លេសបានរក្សាចំណងមិត្តភាពយ៉ាងរឹងមាំ និងកក់ក្តៅជាមួយអាស៊ាន ចាប់តាំងពីពេលដែលប្លុកក្នុងតំបន់នេះត្រូវបានបង្កើតឡើងក្នុងឆ្នាំ១៩៦៧ ខណៈភាពជាដៃគូសេដ្ឋកិច្ចដ៏យូរអង្វែងនេះបានធ្វើឱ្យពាណិជ្ជកម្មទ្វេភាគីទំនិញ និងសេវាកម្មទំហំទឹកប្រាក់ឈានដល់ប្រមាណ ៤២ពាន់លានអឺរ៉ូគិតរហូតមកដល់ថ្ងៃនេះ។
ដោយមើលឃើញពីផលប៉ះពាល់ដ៏ធំធេងនៃជំងឺរាតត្បាត ដែលបានកើតមានលើពិភពលោក ចក្រភពអង់គ្លេស និងអាស៊ានបានឯកភាពលើសារៈសំខាន់នៃកិច្ចសហប្រតិបត្តិការសេដ្ឋកិច្ច និងឯកភាព ដើម្បីកាត់បន្ថយផលវិបាកសេដ្ឋកិច្ចដែលបណ្តាលមកពីជំងឺរាតត្បាត។ នេះបើយោងតាមការចេញផ្សាយរបស់កាសែតបាងកកប៉ុស្តិ៍នៅថ្ងៃទី២៦ ខែតុលា ឆ្នាំ២០២០ ។
ឥឡូវអង់គ្លេសកំពុងព្យាយាមក្លាយជាដៃគូសន្ទនាដែលគួរឱ្យទុកចិត្តមួយរបស់អាស៊ាន ដែលនឹងអនុញ្ញាតឱ្យតំណាងរបស់ខ្លួនបង្ហាញខ្លួននៅក្នុងកិច្ចប្រជុំថ្នាក់រដ្ឋមន្ត្រីអាស៊ាន និងកិច្ចប្រជុំកំពូលនានា។ ការចូលរួមរបស់វានឹងជួយបង្កើនការសហការផ្នែកសេដ្ឋកិច្ច និងសង្គម។
នៅក្នុងកិច្ចប្រជុំតាមប្រព័ន្ធអ៊ីនធឺណេត ដែលបានធ្វើឡើងនៅថ្ងៃទី ៣០ ខែកញ្ញានេះ លោកប្រាក់ សុខុន រដ្ឋមន្ត្រីក្រសួងការបរទេសកម្ពុជា បានមានប្រសាសន៍ថា ប្រទេសកម្ពុជាគាំទ្រយ៉ាងខ្លាំងនូវពាក្យសុំរបស់អង់គ្លេសដើម្បីធ្វើជាដៃគូសន្ទនាជាមួយអាស៊ាន។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្តែងក្តីសង្ឃឹមថា ឋានៈជាដៃគូសន្ទនាក៏នឹងធ្វើឱ្យចក្រភពអង់គ្លេសក្លាយជាដៃគូការទូតដ៏រឹងមាំរបស់កម្ពុជាផងដែរ ជាមួយនឹងការធ្វើឱ្យប្រសើរឡើងនូវពាណិជ្ជកម្ម និងកិច្ចសហប្រតិបត្តិការ។
ចក្រភពអង់គ្លេសចង់សហការកាន់តែស៊ីជម្រៅថែមទៀតជាមួយអាស៊ានលើបញ្ហាបរិស្ថាន ទំនើបកម្មឌីជីថល និងពាណិជ្ជកម្ម។
មេដឹកនាំអន្តរជាតិដែលមានការទទួលស្គាល់នៅក្នុងការបម្រែបម្រួលអាកាសធាតុ ចក្រភពអង់គ្លេសបានសន្យាថា នឹងមិនធ្វើឱ្យមានការបំភាយកាបូននៅឆ្នាំ ២០៥០ ៕
