ដោយៈម៉ាណេត
ភ្នំពេញៈ ពាណិជ្ជកម្មទ្វេភាគីរវាងកម្ពុជា និងថៃមានទំហំទឹកប្រាក់៥.៥៦៩ លានដុល្លារក្នុងរយៈពេល៩ខែ ឆ្នាំនេះ ធ្លាក់ចុះ១៩ភាគរយ បើធៀបនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍ពីក្រសួងពាណិជ្ជកម្មថៃ បានបង្ហាញកាលពីថ្មីៗនេះថា ចាប់ពីខែមករា ដល់ខែកញ្ញា ប្រទេសកម្ពុជាបាននាំចេញទំនិញតម្លៃ៩៥៨លានដុល្លារ ទៅថៃ ធ្លាក់ចុះ៤៨ភាគរយ។ ទន្ទឹមនឹងនេះដែរ ការនាំចូលសរុបរបស់កម្ពុជាពីថៃ មានតម្លៃ ៤,៦១១លានដុល្លារ បានថយចុះ៩ភាគរយ។
ការថយចុះនូវពាណិជ្ជកម្មទ្វេភាគី រវាងប្រទេសជិតខាងទាំងពីរនេះ គឺដោយសារតែជំងឺរាតកូវីដ១៩ ដែលបណ្តាលឱ្យមានបញ្ហាដល់ការដឹកជញ្ជូនទំនិញឆ្លងកាត់ព្រំដែន។
លោក Panyarak Poolthup ឯកអគ្គរដ្ឋទូតថៃប្រចាំនៅកម្ពុជាបានថ្លែងថា នៅក្នុងស្ថានភាពនៃជំងឺរាតត្បាត ពាណិជ្ជកម្មរវាងប្រទេសទាំងពីរមានភាពតានតឹង ដោយសារការឆ្លងកាត់ព្រំដែន ត្រូវបានរឹតបន្តឹងធ្វើឱ្យមានការលំបាក សម្រាប់លំហូរទំនិញរវាងប្រទេសទាំងពីរ។
លោកបានសង្កត់ធ្ងន់នៅក្នុងពិធីផ្តល់ជំនួយ សង្គ្រោះមហន្តរាយពីស្ថានទូតថៃដល់គណៈកម្មាធិការជាតិ គ្រប់គ្រងគ្រោះមហន្តរាយនៅថ្ងៃទី២១ ខែតុលាឆ្នាំ ២០២០ថា ប៉ុន្តែសក្តានុពល នៃការវិនិយោគរបស់ប្រទេសកម្ពុជា នៅតែមានសម្រាប់វិនិយោគិននិងធុរកិច្ចថៃ។
បើនិយាយអំពីការវិនិយោគ ទោះបីពិភពលោកកំពុងរងផលប៉ះពាល់ ដោយវិបត្តិជំងឺសកល ក្រុមហ៊ុនថៃនៅកម្ពុជា បានបន្តខ្សែសង្វាក់ផលិតកម្មធម្មតា ហើយក្រុមហ៊ុននិងអាជីវកម្មថៃជាច្រើនបានស្វែងរកឱកាសវិនិយោគនៅកម្ពុជា៕