ដោយៈ សុខុម
ក្រុងឡុងដ៍: ប្រទេសអង់គ្លេស បានសម្រេចចូលរួមជាសមាជិកនៃកិច្ចព្រមព្រៀងវឌ្ឍនភាពគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក (CPTPP) ដែលជាកិច្ចព្រមព្រៀងពាណិជ្ជកម្មធំបំផុតរបស់ខ្លួនចាប់តាំងខ្លួន បានចាកចេញពីសហភាពអឺរ៉ុប។
អង់គ្លេស នឹងក្លាយជាសមាជិកថ្មីដំបូងគេ និងជាប្រទេសដំបូងគេនៅអឺរ៉ុប ដែលចូលរួមក្នុងកិច្ចព្រមព្រៀង CPTPP ចាប់តាំងកិច្ចព្រមព្រៀងដ៏ធំនេះ បានចូលជាធរមានក្នុងឆ្នាំ២០១៨។
នាយករដ្ឋមន្ត្រីអង់គ្លេស លោក Rishi Sunak បានប្រកាសការពីចំណាត់ការនេះ កាលពីព្រឹកថ្ងៃសុក្រ ទី៣១ ខែមីនា ហើយបានសរសើរថា វាជាចំណាត់ការជាប្រវត្តិសាស្ត្រមួយ ដែលអាចជួយជំរុញកំណើនសេដ្ឋកិច្ចក្នុងប្រទេសនេះ បានចំនួន២,២ពាន់លានដុល្លារ ក្នុងរយៈពេលវែង។
ខុទ្ទកាល័យរបស់លោក Rishi Sunak លើកឡើងថា “ប្លុកនេះមានប្រជាជនជាង៥០០លាននាក់ ហើយនឹងគ្របដណ្ដប់១៥%នៃផលទុនជាតិសរុប (GDP) របស់ពិភពលោក នៅពេលអង់គ្លេស ចូលរួម”។
CPTPP ជាកិច្ចព្រមព្រៀងពាណិជ្ជកម្មសេរី ដែលមានសមាជិក១១ប្រទេសរួមមានអូស្ត្រាលី ព្រុយណេ កាណាដា ស៊ីលី ជប៉ុន ម៉ាឡេស៊ី ម៉ិកស៊ិក នូវែសេឡង់ ប៉េរូ សិង្ហបុរី និងវៀតណាម។
កិច្ចព្រមព្រៀងនេះ បានវិវឌ្ឍចេញពីកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) បន្ទាប់ពីសហរដ្ឋអាមេរិក បានដកខ្លួនចេញក្រោមរដ្ឋការដឹកនាំ របស់អតីតប្រធានាធិបតី ដូណាល់ ត្រាំ ក្នុងឆ្នាំ២០១៧។
ការចុះកិច្ចព្រមព្រៀងរបស់អង់គ្លេស នេះសម្រេចបានជិត២ឆ្នាំបន្ទាប់ពីខ្លួនចាប់ផ្តើមចរចា ដើម្បីចូលរួមក្នុងកិច្ចព្រមព្រៀងពាណិជ្ជកម្មសេរីនេះ។
ក្នុងនាមជាសមាជិក ការនាំចេញជាង៩៩%របស់អង់គ្លេស ទៅកាន់ប្រទេសជាសមាជិទាំង១១ខាងលើ នឹងនាំចេញដោយរួចពន្ធ
នោះរួមមានការនាំចេញសំខាន់ៗដូចជា ឈីស រថយន្ត សូកូឡា គ្រឿងចក្រ និងស្រាវីស្គីផងដែរ។
ខុទ្ទការល័យរបស់លោក Rishi Sunak បានចេញសេចក្តីថ្លែងការណ៍ថា ក្នុងឆ្នាំ២០២២ គិតត្រឹមខែកញ្ញា ប្រទេសអង់គ្លេស បាននាំចេញទំនិញ ដែលមានទំហំ៧៥ពាន់លានដុល្លារ ទៅកាន់បណ្ដាប្រទេសជាសមាជិករបស់ CPTPP៕ CNN៕
