ដោយ: គង់ លាងហួរ
សៀមរាប: ការសាងសង់ព្រលានយន្តហោះអន្តរជាតិអង្គរសៀមរាបបានសម្រេចបាន៩០ភាគរយហើយ ខណៈដែលក្រុមហ៊ុនសំណង់កំពុងពន្លឿនការងាររបស់ខ្លួន ដើម្បីឲ្យការសម្ពោធជាផ្លូវការអាចធ្វើឡើងតាមការគ្រោងទុកនៅខែតុលាខាងមុខនេះ។
ការធ្វើបច្ចុប្បន្នភាពថ្មីនេះត្រូវបានចែករំលែកក្នុងដំណើរទស្សនកិច្ចត្រួតពិនិត្យរបស់គណៈកម្មាធិការដឹកនាំការសាងសង់អាកាសយានដ្ឋានអន្តរជាតិសៀមរាបអង្គរ ដឹកនាំដោយលោក តឹករ៉េត សំរេចរដ្ឋលេខាធិការទីស្តីការគណៈរដ្ឋមន្ត្រី ទៅកាន់ការដ្ឋានសាងសង់កាលពីថ្ងៃអង្គារកន្លងទៅនេះ។
គណៈកម្មាធិការបានឱ្យដឹងទៀតថា គិតត្រឹមដំណាច់ខែមីនា គម្រោងអាកាសយានដ្ឋានអន្តរជាតិសៀមរាបអង្គរសម្រេចបាន៩០ភាគរយដូចការគ្រោងទុក ហើយបានត្រៀមរួចរាល់សម្រាប់ការសាកល្បងហោះហើរក្នុងខែឧសភាឆ្ពោះទៅការសម្ពោធជាផ្លូវការនៅថ្ងៃទី១៦ ខែតុលា ឆ្នាំ២០២៣។
អាកាសយានដ្ឋានអន្តរជាតិសៀមរាប-អង្គរ ស្ថិតនៅក្នុងឃុំតាយ៉ែក ស្រុកសូទ្រនិគម ដែលមានចម្ងាយប្រហែល៥១គីឡូម៉ែត្រពីក្រុងសៀមរាប និង៤០គីឡូម៉ែត្រពីប្រាសាទអង្គរវត្ត។
ការសាងសង់អាកាសយានដ្ឋានអន្តរជាតិសៀមរាប-អង្គរបានចាប់ផ្តើមឡើងនៅខែមីនា ឆ្នាំ២០២០ ដោយក្រុមហ៊ុន AIAI និងលាតសន្ធឹងលើផ្ទៃដីទំហំ៧០០ហិកតា។ អាកាសយានដ្ឋានដែលមានតម្លៃ៨៨០លានដុល្លារនេះគឺជាប្រភេទ 4E ដែលអាចឱ្យវាគ្រប់គ្រងយន្តហោះផ្លូវឆ្ងាយបាន៕
