ពលរដ្ឋខ្មែរ សម្រុកទៅដើរលេងកម្សាន្តនៅប្រទេសវៀតណាម ច្រើនគួរឱ្យ​កត់សម្គាល់ក្នុងឆ្នាំ២០២៣

សុខុម

ហូជីមិញ: ចាប់តាំងពីដើមឆ្នាំ២០២៣ ប្រទេសវៀតណាម បាននិងកំពុងទាក់ទាញភ្ញៀវទេសចរខ្មែរ បានយ៉ាងច្រើនសន្ធឹកសន្ធាប ក្រៅពីអ្នកដែលទៅដើម្បីពិនិត្យសុខភាព។ នេះបើយោងតាមសារព័ត៌មាន Vietnam News ចុះផ្សាយកាលពីថ្ងៃអាទិត្យ ទី២៦ ខែមីនា។

ច្រកទ្វារព្រំដែន Moc Bai នៃខេត្តតាយនិញ (Tay Ninh) បានស្វាគមន៍ភ្ញៀវទេសចរជិត២០០.០០០នាក់ក្នុងចំណោមពលរដ្ឋខ្មែរ សរុបចំនួន៣៩០.០០០នាក់ដែលធ្វើដំណើរចូលទៅក្នុងប្រទេសវៀតណាម។

លោក Truong Duc Hai នាយកក្រុមហ៊ុនទេសចរណ៍វៀតណាម Orient Pearl Travel Co., Ltd. បានលើកឡើងថា “ពលរដ្ឋខ្មែរ ធ្លាប់តែមកទីនេះ (ប្រទេសវៀតណា) សម្រាប់តែគោលបំណងព្យាបាលប៉ុណ្ណោះ ប៉ុន្តែថ្មីៗនេះមានការកើនឡើងនូវចំនួនពលរដ្ឋខ្មែរ ដែលមកទេសចរណ៍កម្សាន្ត។ ពួកគេចូលចិត្តមកលេងឆ្នេរសមុទ្រដូចជា Vung Tau និង Nha Trang ជាដើម”។

លោកក៏បានលើកឡើងដែរថា វាជាការចាំបាច់ណាស់ដែលវិស័យទេសចរណ៍សុខាភិបាលរបស់វៀតណាម ត្រូវមានដំណើរទេសចរណ៍ប្រកបដោយវិជ្ជាជីវៈតាមរយៈការតភ្ជាប់ជាមួយមន្ទីរពេទ្យដ៏មានកិត្យានុភាពនានា។

លោក Pham Ngọc Ha អគ្គនាយករងក្រុមហ៊ុនទេសចរណ៍ Saco Travel និយាយថា ភ្ញៀវទេសចរកម្ពុជា ភាគច្រើនស្នាក់នៅក្នុងប្រទេសវៀតណាម រយៈពេលខ្លី ដូច្នេះភ្នាក់ងារទេសចរណ៍នានាកំពុងតែផ្តោតលើការកែលម្អគុណភាពសេវាកម្ម។

បណ្ដាភ្នាក់ងារទេសចរណ៍ក៏បាននិងកំពុងស្នើឱ្យបណ្ដាខេត្តជាប់ព្រំដែនកម្ពុជា ជួយសម្រួលនីតិវិធីឆ្លងដែនផងដែរ ព្រោះពួកគេនៅតែប្រើពេលវេលាច្រើននៅឡើយ។

លោក Tran Quoc Tinh នាយកមជ្ឈមណ្ឌលផ្សព្វផ្សាយទេសចរណ៍ខេត្តតាយនិញ លើកឡើងថា ខេត្តនេះមានសក្ដានុពលទាក់ទាញភ្ញៀវទេសចរណ៍ ដោយសារមានច្រកទ្វារព្រំដែនធំៗចំនួន៣ និងច្រកតូចៗចំនួន១០ដែលនៅជាប់ខេត្តចំនួន៣របស់កម្ពុជា។

ភ្ញៀវទេសចរពីកម្ពុជា សម្រុកទៅលេងខេត្តតាយនិញ ជារៀងរាល់ឆ្នាំ ជាពិសេសនៅថ្ងៃចុងសប្តាហ៍ និងរដូវបុណ្យទាន ដោយពួកគេទៅលេងវត្ត និងភ្នំ Nui Ba ច្រើនជាងគេ។ ភ្នំ Nui Ba ក៏បាននិងកំពុងទទួលបានការវិនិយោគដើម្បីបើកកម្មវិធីទេសចរណ៍បន្ថែមទៀត ដោយជំរុញទេសចរណ៍ក្នុងស្រុក។

យោងតាមមន្ទីរវប្បធម៌ កីឡា និងទេសចរណ៍ខេត្តតាយនិញ បានឱ្យដឹងថា ចាប់តាំងពីឆ្នាំ២០២២ ខេត្តនេះបានរៀបចំកម្មវិធីមួយចំនួន ដើម្បីលើកស្ទួយវិស័យទេសចរណ៍រវាងប្រទេសវៀតណាម និងប្រទេសកម្ពុជា។

សហគ្រាសមកពីប្រទេសទាំងពីរក៏នឹងរួមដៃគ្នាជំរុញទេសចរណ៍ និងអភិវឌ្ឍផលិតផលទេសចរណ៍ផងដែរ៕ Vietnam News៕