ដោយៈ គង់ ម៉ាលីនណា
ភ្នំពេញៈ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានលើកឡើងថា រយៈពេល១០ឆ្នាំចុងក្រោយនេះ ការកែទម្រង់ហិរញ្ញវត្ថុសាធារណៈ និងការប្រមូលចំណូលរបស់អគ្គនាយកដ្ឋានគយ និងអគ្គនាយកដ្ឋានពន្ធដារបានល្អ ផ្តល់លទ្ធភាពសម្រាប់រាជរដ្ឋាភិបាល ឆ្លើយតបបាននូវបញ្ហាប្រឈមមិនធ្លាប់មាន ដូចជាវិបត្តិជំងឺកូវីដ១៩ បញ្ហាសង្គ្រាមរុស្ស៉ី-អ៊ុយក្រែន បង្កើតឲ្យមានសម្ពាធអតិផរណាជាដើម។
លោកថ្លែងបែបនេះ ក្នុងឱកាសសម្ពោធដាក់ឲ្យប្រើប្រាស់ជាផ្លូវការ អគាររដ្ឋបាលអគារស្នាក់នៅ និងហេដ្ឋារចនាសម្ព័ន្ធនានា នៃសាខាគយ និងរដ្ឋាករខេត្តស្ទឹងត្រែង នាចុងសប្តាហ៍កន្លងទៅនេះ។
លោកឧបនាយករដ្ឋមន្ត្រីបានបន្តថា បើសិនកិច្ចការកែទម្រង់ហិរញ្ញវត្ថុសាធារណៈ រយៈពេល១០ឆ្នាំចុងក្រោយនេះ ដំណើរការមិនមានល្អ ពិសេសការងារប្រមូលចំណូលរបស់អង្គភាពធំៗពីរ [គយ និងពន្ធដារ] ក្រោមឱវាទក្រសួងសេដ្ឋកិច្ច និងហិរញ្ញវត្ថុផ្ទាល់ ធ្វើការមិនបានល្អទេ ដែលការប្រមូលចំនូលរបស់គយ និងពន្ធដារ ពីរនេះស្មើនឹង៩០ភាគរយ នៃចំណូលរបស់ជាតិសរុប លទ្ធផលនៃការងាររបស់យើងក្នុងផ្នែកនេះ បានផ្តល់លទ្ធភាពសម្រាប់រាជរដ្ឋាភិបាល គ្រប់គ្រងសភាពការណ៍បាន ជាមួយនឹងការអភិវឌ្ឍ ឆ្លើយបតទៅនឹងបញ្ហាប្រឈមដែលមិនធ្លាប់មាន ដូចជាជំងឺកូវីដ១៩ ការពារអាយុជីវិតប្រជាពលរដ្ឋបាន បង្កើតភាពសុំាសហគមន៍បាន អនុញ្ញាតឲ្យយើងបើកប្រទេសឡើងវិញ សកម្មភាពសង្គមសេដ្ឋកិច្ចឡើងវិញ ដែលជាប្រទេសមួយដែលធ្វើកិច្ចការនេះ បានល្អជាងគេ មិនមែនត្រឹមតែក្នុងកម្រិតតំបន់ គឺកម្រិតសកលថែមទៀតផង។
លោកបន្តថា ដោយសារតែយើងមានមរតកល្អប្រសើរ ក្នុងការកៀរគរចំណូលកន្លងមកអនុញ្ញាតឲ្យយើង ឆ្លើយតបទៅនឹងបញ្ហាប្រឈមបាន មិនត្រឹមតែកូវីដ១៩ទេ នៅក្រោយកូវីដ១៩មក យើងបន្តជួបការប្រឈម ជាមួយបញ្ហាសង្គ្រាមរុស្ស៉ី-អ៊ុយក្រែន សម្ពាធអតិផរណា ដែលតម្រូវឲ្យយើងយកចិត្តទុកដាក់ដោះស្រាយ ធានាលំនឹងជីវភាព របស់ប្រជាពលរដ្ឋយើងបាន ដោយមួយឆ្នាំយើងចំណាយជិត៤០០លានដុល្លារ គ្រាប់តែសម្រាប់ធានាលំនឹងជីវភាព របស់ប្រជាពលរដ្ឋ ដែលនេះជាសារសំខាន់នៃការគៀងគរចំណូល៕
