ដោយ: គង់ លាងហួរ
អន្តរជាតិ: ក្រុមហ៊ុនឡូជីស្ទីកសកល DHL បានអះអាងថា កំណើនពាណិជ្ជកម្មអន្តរជាតិត្រូវបានគេព្យាករណ៍ថា នឹងនៅទ្រឹងនៅឆ្នាំនេះ ដោយសារប្រទេសនានាបានដំឡើងអត្រាការប្រាក់ដើម្បីទប់ទល់នឹងអតិផរណា ដែលនាំទៅរកការធ្លាក់ចុះនៃសេដ្ឋកិច្ចទូទាំងពិភពលោក។
យោងតាមសន្ទស្សន៍ការតភ្ជាប់សកលឆ្នាំ២០២២បានឱ្យដឹងថា ទំហំពាណិជ្ជកម្មសកលក្នុងទំនិញបានឈានដល់១០ភាគរយ លើសពីកម្រិតមុនជំងឺរាតត្បាតនៅពាក់កណ្តាលឆ្នាំមុន បើទោះបីជាមានការកាត់បន្ថយទំនាក់ទំនងពាណិជ្ជកម្មរវាងសហរដ្ឋអាមេរិក និងចិនយ៉ាងណាក្តី។
របាយការណ៍នោះបានកត់សម្គាល់ថា “ការកាត់ផ្តាច់រវាងប្រទេសទាំងពីរមិនទាន់បាននាំឱ្យមានការបែកខ្ញែកកាន់តែទូលំទូលាយនៃលំហូរសកលរវាងប្លុកគូប្រជែងនៃប្រទេសនានានោះទេ”។
ការព្យាករណ៍នាពេលថ្មីៗនេះដោយមូលនិធិរូបិយវត្ថុអន្តរជាតិបានបង្ហាញថាទំហំពាណិជ្ជកម្មនឹងកើនឡើងត្រឹមតែ២,៤ភាគរយប៉ុណ្ណោះ ក្នុងឆ្នាំ២០២៣នេះ ដែលធ្លាក់ចុះពីការព្យាករណ៍មុនសង្គ្រាមចំនួន៤,៩ភាគរយ។
ក្រុមហ៊ុន S&P Global បានព្យាករណ៍ពី កំណើនពាណិជ្ជកម្មពិតប្រាកដនៅក្នុងទំនិញក្នុងអត្រា០,៦ភាគរយ ជាមួយនឹងកំណើនពាណិជ្ជកម្មជាវិជ្ជមានក្នុងអំឡុងឆមាសទីពីរនៃឆ្នាំ២០២៣នេះ។
កំណើនពាណិជ្ជកម្មដ៏យឺតភាគច្រើនបណ្តាលមកពីបណ្តាប្រទេសនានាដំឡើងអត្រាការប្រាក់ដើម្បីទប់ទល់នឹងការកើនឡើងនៃអតិផរណា។ កត្តាផ្សេងទៀតដែលមានទម្ងន់លើកំណើនពាណិជ្ជកម្ម រួមមានថ្លៃថាមពលខ្ពស់ និងការផ្ទុះឡើងនៃជំងឺកូវីដនៅក្នុងប្រទេសចិន ដែលនាំឱ្យមានការរំខានដល់ការផ្គត់ផ្គង់មួយចំនួន៕
