ដោយ: គង់ លាងហួរ
ភ្នំពេញ: រដ្ឋាភិបាលជប៉ុនបានផ្តល់ជំនួយឥតសំណងចំនួន១៤៥.៦៩២ដុល្លារអាមេរិក សម្រាប់សាងសង់មជ្ឈមណ្ឌលបច្ចេកវិទ្យាសហគមន៍ (CTC) នៅស្រុកបាទី ខេត្តតាកែវ។
គម្រោងថ្មីនេះត្រូវបានគេរំពឹងថានឹងផ្តល់ការបណ្តុះបណ្តាលដល់សិស្សចំនួន១.០០០នាក់ ដើម្បីបង្កើនជំនាញឌីជីថលរបស់ពួកគេ ក្រៅពីជួយប្រជាពលរដ្ឋក្នុងស្រុកចំនួន៨.០០០នាក់ឱ្យរៀនពីបច្ចេកវិទ្យាព័ត៌មាន និងទំនាក់ទំនង (ICT) ។
គម្រោងនេះអនុវត្តដោយមន្ទីរប្រៃសណីយ៍ និងទូរគមនាគមន៍ខេត្តតាកែវ ហើយវាក៏ជាផ្នែកមួយនៃគំនិតផ្តួចផ្តើមរបស់ក្រសួងប្រៃសណីយ៍ និងទូរគមនាគមន៍ ដើម្បីបើក CTCs នៅទូទាំងប្រទេស ដើម្បីលើកកម្ពស់ជំនាញឌីជីថលរបស់ប្រជាជនកម្ពុជាផងដែរ។
លោក Ueno Atsushi ឯកអគ្គរដ្ឋទូតជប៉ុនប្រចាំនៅកម្ពុជា បង្ហាញក្តីសង្ឃឹមថា “គម្រោងនេះនឹងជួយដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការលើកកម្ពស់ជំនាញឌីជីថលរបស់ប្រជាជន”។
លោកឯកអគ្គរដ្ឋទូតបានកត់សម្គាល់ថា ប្រទេសជប៉ុនប្តេជ្ញាជួយកម្ពុជាដោះស្រាយបញ្ហាប្រឈមក្នុងការអភិវឌ្ឍន៍ តាមរយៈគម្រោងជំនួយអភិវឌ្ឍន៍ផ្លូវការជាច្រើន រួមទាំងកម្មវិធី Kusanoneផងដែរ។
លោកបានបន្តថា “កម្ពុជាកំពុងអភិវឌ្ឍខ្លួនយ៉ាងលឿន ប៉ុន្តែទន្ទឹមនឹងនេះ កម្ពុជានៅមានបញ្ហាប្រឈមមួយចំនួនដែលត្រូវដោះស្រាយ ដើម្បីលើកកម្ពស់គុណភាពជីវិតរបស់ប្រជាពលរដ្ឋ ហើយប្រទេសជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនេះតាមរយៈគម្រោងជំនួយអភិវឌ្ឍន៍ផ្លូវការជាច្រើន រួមទាំងជំនួយ Kusanone ផងដែរ”។
លោក Takei Shunsuke រដ្ឋមន្ត្រីក្រសួងការបរទេសជប៉ុនបានថ្លែងកាលពីពេលថ្មីៗនេះថា“ការអភិវឌ្ឍដ៏គួរឱ្យកត់សម្គាល់របស់កម្ពុជាក្នុងវិស័យសេដ្ឋកិច្ច និងហេដ្ឋារចនាសម្ព័ន្ធទាក់ទាញការវិនិយោគរបស់ជប៉ុន ហើយទំនាក់ទំនងរបស់ប្រទេសជប៉ុន និងកម្ពុជាអាចកាន់តែរុឹងមាំឡើង”៕