ដោយៈ គង់ ម៉ាលីនណា
ភ្នំពេញៈ ពិព័រណ៍ចិន អាស៊ាន ដែលគ្រោងធ្វើឡើងនៅទីក្រុងណាននីងខេត្តក្វាងស៊ី ប្រទេសចិននៅពេលខាងមុខនេះ ក្រសួងពាណិជ្ជកម្មកម្ពុជា នឹងកៀរគរក្រុមហ៊ុន សហគ្រាស ក៏ដូចជាពាណិជ្ជករកម្ពុជាចូលរួមឱ្យបានច្រើន ដើម្បីស្វែងរកដៃគូអាជីវកម្មនិងពាណិជ្ជកម្មជាមួយគ្នា។
ថ្លែងនៅក្នុងវេទិការផ្សព្វផ្សាយពិព័រណ៍ចិន អាស៊ាន លើកទី២០ នៅទីស្ដីការក្រសួងពាណិជ្ជកម្មកម្ពុជានៅថ្ងៃទី១៥ មីនា២០២៣ លោកឈួន ដារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងពាណិជ្ជកម្មកម្ពុជាបានមានប្រសាសន៍ថា ក្រសួងពាណិជ្ជកម្មកម្ពុជា បានធ្វើជាដៃគូសហការរៀបចំចូលរួមពិព័រណ៍ចិន អាស៊ានជាលើកដំបូងនៅឆ្នាំ២០០៤ ដែលរហូតមកដល់ពេលនេះ មានចំនួន២០លើកហើយគិតទាំងឆ្នាំ២០២៣នេះ និងបានធ្វើជាប្រទេសកិត្តិយសចំនួន២លើកផងដែរ ដែលលើកទី១ នៅឆ្នាំ ២០០៨ និងលើកទី២នៅឆ្នាំ ២០១៨ ។
លោកបន្តថា ការចូលរួមរបស់កម្ពុជា ក្នុងពិព័រណ៍ចិន-អាស៊ានពីមួយឆ្នាំ ទៅមួយឆ្នាំ បានធ្វើឱ្យមានការកើនឡើង ទាំងចំនួនក្រុមហ៊ុន ទាំងពាណិជ្ជករ ហើយក្នុងការចូលរួមមួយលើកៗ កម្ពុជា បានទទួលពានរង្វាន់ជាហូរហែរតាមប្រភេទនីមួយៗ ពីគណៈកម្មការ CAEXPO ដូចជា៖ ពានរង្វាន់Best Visitor Organizer, Best City of Cham Pavilion Preparation, Best Promotion on Investment Cooperationជាដើម។
ទាក់ទងនឹងព្រឹត្តិការណ៍នេះ ក្រសួងពាណិជ្ជកម្ម បានត្រៀមលក្ខណៈចូលរួមពិព័រណ៍ចិន -អាស៊ានលើកទី២០ ឆ្នាំ២០២៣ ខាងមុខនេះ និងបានត្រៀមខ្លួនរួមសហការ ជាមួយលេខាធិការដ្ឋាននៃគណៈកម្មការរៀបចំពិព័រណ៍ចិន -អាស៊ាន និងក្រសួងស្ថាប័នពាក់ព័ន្ធ រៀបចំវេទិកាធុរកិច្ច វិនិយោគ និងទេសចរណ៍ ក្នុងអំឡុងពេលពិព័រណ៍ ដើម្បីកៀគរអ្នកទេសចរណ៍ និងវិនិយោគិនចិនចូលមកទស្សនា និងវិនិយោគនៅកម្ពុជា។
ពិព័រណ៍ចិន-អាស៊ានលើកទី២០ ឆ្នាំ២០២៣ នឹងប្រព្រឹត្តទៅចាប់ពីថ្ងៃទី១៦-២០ ខែកញ្ញា ឆ្នាំ២០២៣ នៅទីក្រុងណាននីង តំបន់ស្វយ័តក្វាងស៊ី ប្រទេសចិន។ វេទិកាផ្សព្វផ្សាយនេះ មានគោលបំណងកៀរគរក្រុមហ៊ុន សហគ្រាស និងពាណិជ្ជករកម្ពុជា ទៅចូលរួមពិព័រណ៍ចិន-អាស៊ានដោយផ្ទាល់ឡើងវិញ ដូចមុនកើតមានវិបត្តិកូវីដ-១៩ ហើយក្រសួងពាណិជ្ជកម្ម ក្នុងនាមប្រធានគណៈកម្មការអន្តរក្រសួង ដើម្បីរៀបចំនិងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ នឹងជ្រើសរើសខេត្តស្រស់ប្រិមប្រីយ របស់កម្ពុជា សម្រាប់រៀបចំសាងសង់ជាពន្លាជាតិ ក្នុងព្រឹត្តិការណ៍ពិព័រណ៍ខាងលើ សម្រាប់ជូនភ្ញៀវទស្សនា ដើម្បីទាក់ទាញការចាប់អារម្មណ៍របស់អ្នកទស្សនាអន្តរជាតិ៕
