ដោយ: គង់ លាងហួរ
សិង្ហបុរី: ផ្សារហ៊ុននៅតំបន់អាស៊ី បានហក់ឡើងថ្លៃខ្លាំងនៅថ្ងៃពុធនេះ ដោយតាមដានការហក់ឡើងនៅផ្សារហ៊ុន Wall Street ហើយទិន្នន័យអតិផរណាអាមេរិក មិនបានផ្តល់ការភ្ញាក់ផ្អើលអាក្រក់ និងផ្តល់សង្ឃឹមថា ធនាគារ Federal Reserve អាចនឹងដំឡើងការប្រាក់តិចជាងមុននៅសប្តាហ៍ក្រោយ។
ក្រុមវិនិយោគិនជាច្រើន បានវិលចូលទៅក្នុងផ្សារហ៊ុនសហរដ្ឋអាមេរិកពេញមួយយប់ឡើងវិញ ខណៈដែលការភ័យខ្លាចអំពីការរីករាលដាលនៃវិបត្តិនៅក្នុងវិស័យធនាគារ បន្ទាប់ពីការដួលរលំនៃធនាគារ Silicon Valley (SVB) កាលពីសប្តាហ៍មុនបានធូរស្រាល។
សន្ទស្សន៍ផ្សារហ៊ុនដ៏បំផុតរបស់ MSCI នៃតំបន់អាស៊ីប៉ាស៊ីហ្វិកនៅខាងក្រៅប្រទេសជប៉ុន បានហក់ឡើង១,៤៤ភាគរយ ដោយបានធ្លាក់ចុះ១,៧ភាគរយ កាលពីថ្ងៃអង្គារ បន្ទាប់ពីការដួលរលំរបស់ធនាគារ SVB ដែលបានបង្កឱ្យមានការលក់ភាគហ៊ុន ចេញយ៉ាងខ្លាំងពីសំណាក់វិនិយោគិន នៅក្នុងវគ្គជួញដូរចំនួន២ ទៅ៣លើកចុងក្រោយ។
សន្ទស្សន៍ផ្សារហ៊ុន S&P/ASX 200 របស់អូស្ត្រាលីបានហក់ឡើង០,៣៣ភាគរយ នៅក្នុងការជួញដូរដំបូង ខណៈដែលផ្សារហ៊ុន Nikkei របស់ប្រទេសជប៉ុនភាគច្រើននៅទ្រឹង។
ចំណែក ផ្សារហ៊ុនរបស់ប្រទេសចិន មានការហក់ឡើងថ្លៃ០,៤៦ភាគរយ ខណៈដែលសន្ទស្សន៍ផ្សារហ៊ុន Hang Seng របស់ទីក្រុងហុងកុងបានហក់ឡើងថ្លៃរហូតដល់ទៅ១,៤ភាគរយ។
ទិន្នផលឧស្សាហកម្មរបស់ប្រទេសចិន ក្នុងរយៈពេល២ខែដំបូងនៃឆ្នាំ២០២៣ បានកើនឡើង២,៤ភាគរយធៀបនឹងឆ្នាំមុន ដោយបង្កើនល្បឿន ពីកំណើនប្រចាំឆ្នាំ១,៣ភាគរយ ដែលបានកត់ត្រានៅក្នុងខែធ្នូ។ ទិន្នន័យនេះ បានខុសផ្ទុយពីការព្យាករណ៍តិចតួច សម្រាប់កំណើន២,៦ភាគរយ នៅក្នុងការស្ទង់មតិរបស់សារពត៌មាន Reuters ពីក្រុមអ្នកវិភាគ។
ក្រុមវិនិយោគិនក៏បានធូរចិត្តផងដែរ បន្ទាប់ពីរបាយការណ៍អតិផរណានៅខែកុម្ភៈ របស់សហរដ្ឋអាមេរិកបានបង្ហាញថា តម្លៃអ្នកប្រើប្រាស់កើនឡើង០,៤ភាគរយ ជាមួយនឹងកំណើន៦ភាគរយ ពីមួយឆ្នាំទៅមួយឆ្នាំ ស្របតាមការរំពឹងទុករបស់អ្នកវិភាគ ដោយសារគេមានក្តីបារម្ភថា ប្រសិនបើទិន្នន័យខ្លាំងជាងការរំពឹងទុក នោះវាអាចនឹងនាំឱ្យធនាគារកណ្តាលអាមេរិក ដំឡើងអត្រាការប្រាក់កាន់តែខ្លាំងដើម្បីទប់ទល់នឹងអតិផរណា៕
