ដោយៈ ម៉ាលីនណា
ភ្នំពេញៈ របាយការណ៍បានបង្ហាញថា ការនាំចេញទំនិញពីកម្ពុជា ទៅកាន់ប្រទេសវៀតណាម នៅក្នុងរយៈពេល ២ ខែដើមឆ្នាំ ២០២៣ មានជាង ៤៩១ លានដុល្លារ កើនជាង ៣៦ ភាគរយបើធៀបនឹងរយៈពេលដូចគ្នាឆ្នាំមុន។
បើគិតពីទំហំពាណិជ្ជកម្មទ្វេរភាគី មានទឹកប្រាក់ជិត១,១ ពាន់លានដុល្លារ។ វៀតណាម គឺជាប្រទេសដែលមានទំនាក់ទំនងពាណិជ្ជកម្មទ្វេភាគីធំទី៣ ជាមួយកម្ពុជាបន្ទាប់ពីប្រទេសចិន និងអាមេរិក។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងខែមករាកុម្ភៈ ឆ្នាំ ២០២៣ កម្ពុជាបាននាំទំនិញ ទៅប្រទេសវៀតណាម ក្នុងតម្លៃសរុប៤៩១,១៨ លានដុល្លារ កើន៣៦,១ ភាគរយធៀបនឹង ៣៦០,៨៤៣ លានដុល្លារ កាលពីអំឡុងខែមករា-កុម្ភៈ ឆ្នាំ ២០២២។
ជាមួយគ្នានេះវៀតណាម ក៏បាននាំទំនិញមកកម្ពុជាវិញចំនួន ៥៩៣,៥៥៧ លានដុល្លារ កើន០,៧ ភាគរយពីចំនួន៥៨៩,២៧៨ លានដុល្លារ។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ឲ្យដឹងថា ដោយសារតែមានព្រំប្រទល់ជាប់គ្នាប្រទេសទាំង២ តែងនាំទំនិញនាំចេញ -នាំចូលទៅវិញទៅមកច្រើន ដោយចំនួនទឹកប្រាក់ពិតប្រាកដ គឺមានច្រើនលើសនេះទៀត។
លោកបន្តថា ភាគច្រើននៃផលិតផលដែលកម្ពុជា នាំទៅវៀតណាម គឺជាផលិតផលកសិកម្ម ឬជាវត្ថុធាតុដើមសម្រាប់កែច្នៃ។ លោកបន្តថា អ្វីដែលគួរឱ្យកត់សម្គាល់ពេលនេះ គឺការនាំចេញកសិផលពីកម្ពុជាទៅវៀតណាម កំពុងមានភាពវិជ្ជមានជាបន្តបន្ទាប់៕