ដោយៈ សុខុម
វ៉ាស៊ីនតោន: ក្រុមសមាជិកសភាអាមេរិក ដែលមកពីគណបក្សសាធារណរដ្ឋ និងគណបក្សប្រជាធិបតេយ្យ មិនបានបង្ហាញសញ្ញាស្រុះស្រួលគ្នានោះឡើយ បន្ទាប់ពីកិច្ចប្រជុំស្ដីពីបំណុលចំនួន៣១ទ្រីលានដុល្លារ របស់ប្រទេសនេះកាលពីថ្ងៃពុធ ទី៨ ខែមីនា ពោលគឺមួយថ្ងៃមុនពេលប្រធានាធិបតី ចូ បៃឌិន គ្រោងនឹងបង្ហាញផែនការចំណាយរបស់រដ្ឋាភិបាលលោកសម្រាប់ឆ្នាំ២០២៤។
លោកចូ បៃឌិន បានអះអាងថា សំណើរបស់លោកនឹងកាត់បន្ថយឱនភាពរបស់សហរដ្ឋអាមេរិក បានជិត៣ទ្រីលានដុល្លារ ក្នុងរយៈពេល១០ឆ្នាំ ទោះបីជាវាត្រូវពឹងផ្អែកលើការដំឡើងពន្ធយ៉ាងណាក្ដី ខណៈគណបក្សសាធារណរដ្ឋ កំពុងជំរុញឱ្យមានការកាត់បន្ថយការចំណាយក្នុងស្រុក ឱ្យបានច្រើនតាមដែលអាចធ្វើទៅបាន។ នេះបើយោងតាមសារព័ត៌មាន CNA ចុះផ្សាយនៅថ្ងៃព្រហស្បតិ៍ ទី៩ ខែមីនា នេះ។
កិច្ចប្រជុំបិទទ្វារ សម្រាប់ក្រុមសមាជិកសភាតំណាងរាស្រ្ដនេះ ធ្វើឡើង ក្នុងបំណងបង្កើតចំណុចរួមមួយ សម្រាប់ការជជែកដេញដោលពីសំណាក់លោក Phillip Swagel ប្រធានការិយាល័យថវិកាសភាមិនចូលបក្សសម្ព័ន្ធដែលបានព្រមានថា បំណុលសហព័ន្ធនឹងកើនលើសទំហំសេដ្ឋកិច្ចរបស់សហរដ្ឋអាមេរិក ទាំងមូលនៅទស្សវត្សរ៍ក្រោយ ប្រសិនបើគ្មានការចាត់វិធានការម៉ឺងម៉ាត់ទេនោះ។
លោក Mike Lawler តំណាងរាស្រ្តមកពីគណបក្សសាធារណរដ្ឋបានថ្លែងថា “វាពិតជាមានសារៈសំខាន់ ដែលសមាជិកនៃគណបក្សទាំងពីរទទួលបានព័ត៌មាន និងអាចពិនិត្យផ្ទៀងផ្ទាត់វាជាមួយគ្នា”។ លោកបន្តថា “ជាក់ស្ដែង យើងមិនយល់ស្របគ្នាគ្រប់ពេលនោះទេ។ ប៉ុន្តែនិយាយដោយត្រង់ទៅ ខ្ញុំយល់ថា នោះជាផ្នែកមួយនៃបញ្ហានៅវ៉ាស៊ីនតោន។ យើងគ្មានឱកាសគ្រប់គ្រាន់ ដើម្បីធ្វើរឿងទាំងនេះជាមួយគ្នានោះទេ”។
គណបក្សសាធារណរដ្ឋ មានសំឡេងភាគច្រើននៅក្នុងសភា ខណៈគណបក្សប្រជាធិបតេយ្យ មានសំឡេងភាគច្រើននៅព្រឹទ្ធសភា។
សេតវិមាននិយាយថា តាមការរំពឹងទុក ផែនការថវិការបស់លោក ចូ បៃឌិន នឹងពន្យារអាយុកាលនៃផែនការថែរទាំសុខភាព Medicare សម្រាប់ពលរដ្ឋអាមេរិក ដែលមានវ័យចាប់ពី៦៥ឆ្នាំឡើងទៅ ខណៈដំឡើងពន្ធលើក្រុមមហាសេដ្ឋី និងពលរដ្ឋដែលមានប្រាក់ចំណូលខ្ពស់។
ទោះជាយ៉ាងណា តាមការរំពឹងទុក គណបក្សសាធារណរដ្ឋនឹងធ្វើបច្ចុប្បន្នភាពនៅត្រឹមថ្ងៃទី១៥ ខែមេសា ហើយបាននិងកំពុងសម្លឹងរកឱកាសកាត់បន្ថយ ការចំណាយ១៥០ពាន់លានដុល្លារ នៅក្នុងកម្មវិធីមិនមែនវិស័យការពារជាតិសម្រាប់ឆ្នាំ២០២៤ ដែលនឹងកំណត់ការចំណាយឡើងវិញ ឱ្យឈានដល់កម្រិតឆ្នាំសារពើពន្ធ២០២២ និងសន្សំសំចៃបាន១,៥ទ្រីលានដុល្លារ ក្នុងរយៈពេលមួយទសវត្សរ៍តាមរយៈការរក្សាការដំឡើងការចំណាយប្រចាំឆ្នាំ១%៕ Reuters៕
